Taɣamsa deg uguren

Anda-tt tɣamsa s tmaziɣt?

Ass agraɣlan n usmekti n tɣamsa yettas-d ass 3 di magu, atan yewweḍ-d, yezra, taɣamsa tezga deg uguren imeqqranen, taɣamsa teḍḥa-d tettcekti di yal tamurt, aṭas n ineɣmasen ay nɣan, llan widen yettwaḥebsen, llan widen yettwaṛekḍen ! Ula d iɣmisen llan wid yellan uɣalen ṛuḥen jjlan! Tilleli n tɣamsa tefcel di tmura yettuwexṛen s tugdut. Ladɣa taɣamsa s tutlayt-nneɣ tamaziɣt, tezga-d twexxeṛ s waṭas, imi ulac ikerwaten neɣ ikubar yerzan akken seddun isallen s yiɣmisen n tmaziɣt, s taɛṛabt kan neɣ s tefṛensist, ma d tamaziɣt wissen anta tamurt ara tt-isqedcen? Llan send yeɣmisen nnulfan-d deg yiseggasen n 1990, yecban Asalu s tmaziɣt s umata, d 'Uɣmis Tamurt' s kra n isebtaren, d 'Uɣmis Iẓuṛan' s kra n isebtaren, llant daɣen kra n tsɣunin(revues), am Yizen Amaziɣ s tmaziɣt s umata, 'Tafuɣalt' n tiddukla n Yusef-U-Qasi ɣur-s azal n sin wuṭṭunen, llan kra n yeɣmisen d tisɣunin anda nniḍen di kra n tdukliwin... Iɣmisen-a uɣalen jjlan ṛuḥen, qqaren: ”s wuguren n tedrimt", d lqella n uzuzer s useǧhedd.
Ma neddem akk asentel-a ad naf taɣamsa n tmaziɣt s tira tettwaǧ, tejjla, tettuwexxeṛ, yewwi-d ad tessɛu azal tɣamsa-s, ama ɣer ikerwaten d tdukliwin, ama ɣer ikubar n tsartit, ur d-yewwi ara ad nettkal kan ɣef ulac! Neɣ ad teqqim akka temsalt n tmaziɣt war aɣmis, d lɛaṛ, d tacemmatt! Neɣ ad ncennu ɣef tmaziɣt, a d-nqeṭṭu yiss, yili nekwni ur s negi azal ula s weɣmis. Ihi win i d-yebdan taɣawsa di tmaziɣt iwata akken ad tt-ikemmel, mačči d tazwawaṭ kan n ugeffur, d ayen atan iɛedda iṛuḥ.