Ansay n Lmulud

Lmulud n Nnbi

Deg wansayen n leqbayel ad naf yiwen wansay i d-ittezzin yal aseggas, wagi d "Lmulud n Nnbi". Di tmetti yettuneḥsab am netta am ansayen¹ nniḍen i d-smektayen imaziɣen, am :

taεacuṛt, d laεyud(tameẓyant d tameqqrant). Ihi Lmulud n Nnbi yettas-d aggur sdeffir n tεacuṛt. Taεacuṛt s wazal-is ɣer leqbayel, s umata leqbayel ttagan-as imensi s weksum ttmelliḥen di lεid tameqqrant, wagi qqaṛen-as "timcellḥin", neɣ "aqeddid", yerna llant tmiwa am igawawen ttagan-as tameɣra tameqqrant s iḍebbalen di lemqamat, tilawin meṛṛa tteffɣent ttzuṛunt. Maca, di Lmulud d ayen nniḍen, tettili-d ciṭṭuḥ n zyaṛa di temqebṛin, ttagan-as imensi s weksum n nefqa i d-ttnefiqen di tsewiqt, acku di yal ansay tettili-d tsewiqt. Yettaεmaṛ ssuq deg wansayen. I syen akkin di Lmulud sṭeṛḍiqen lḥaṛaqat warrac, suturen-d tamellat n tezwiq², ttceεilen izubaq d tcemuεin, tilawin d teḥdayin ttagant urar di lḥaṛa ttεeziṛent ciṭṭuḥ. Cennunt taɣect-a:

Ṭalbi ṭalbi

Ass-a d tameɣra n Nnbi

Feṛḥent lemluk igenni

Rniɣ ula d nekki-nni

A feṛhi-w a saεddi-w

Ass-agi ylul Nnbi

Akka i feṛḥen s wass n Lmulud leqbayel ama zik ama tura. 

Amar Tafat 

*Ass-a d imensi n Lmulud azekka d Lmulud s tezmert n Lmulud nnwen meṛṛa .

1.ansayen: traditions

2. suturen warrac tamellat n tezwiq di Lmulud neɣ di tεacuṛt. Qqaren akka:

Tamellat tamellat

N tezwiq

Win yettuẓumen

Ittseddiq

A t yemneε Ṛebbi i ddiq

Amar Tafat