Amagger n tefsut di temẓi

🌷Ansay - amagger n tefsut - di tmurt n leqbayel🌺

Cfiɣ-d am wassa asmi mecṭuḥeɣ, asmi ssεiɣ 6 n iseggasen d asawen, deg iseggasen n 70, m'akken nettmagar tafsut akked d tnudwin-inu, d aqcic neɣ taqcict.

Ad netturar akk akken deg ugni, neɣ di tala, neɣ di tebḥirin, melmi d-iwweḍ umenzu n tefsut, ad iyi-theggi yemma(fell-as talwit d usgunfu), timellalin tuftiyin, acewwaḍ, aḥeddur, am nek am arrac n taddart. Di tifawt(taṣebḥit), ad nemyaggar akk s igerdan deg ugni, arrac d teḥdayin, ad ninig alama d Tizwiɣin, ad nεeddi akkin Udɣaɣ n tala, d takessart ar teẓgi n taddart(ddaw Tizwiɣin d iɣẓeṛ).Deg-mi ara nebdu tikli d akessar si taddart ɣer tizwiɣin, ad ncennu s taɣect meqqren izli-ya i wakken aɣ-tessel tefsut:

A tafsut! a tafsut!
Muggreɣ-kem-in
S ucebwaḍ! s ucebwaḍ!
Kem magger-iy-id
S lenwaṛ! s lenwaṛ!
A lala tafsut
Am izeǧǧigen
Fkiɣ-am-d aḥeddur
D win ṛqiqen
Amenzu d aqcic
isem-is belqasem!

Mi newweḍ, ad nemmeɣ, ad d-negmer izeǧigen yelhan, a d-nseddu cwiṭ n wuzzu, d asullef. Mi nekfa tagemra n izeǧigen, ad neqqim di tuga(leḥcic), ad nefren amkan zeddigen, ad nečč s umyaɣ gar-anaɣ ayen akken i newwi yid-neɣ.

Mi d-wḍeɣ s axxam, yemma ad iyi-tedεu s rezgg ameqqran, as-fkeɣ tamuqqint-nni iẓeǧigen ad tt-tεelleq di ssqef n daxell n uxxam. Akka i xedmaɣ yal aseggas armi d asmi meqqreɣ.

Mi wḍaɣ 18 n yiseggasen uɣaleɣ sḥebseɣ amagger n tefsut, maca ... Uɣaleɣ ttmaggareɣ Tafsut n imaziɣen, yal 20 yebril deg useggas n 80 d asawen, am nek am imaziɣen ilelliyen. Hatta tmacahutt iyi-isduklen d wansay n Tefsut.

---

Yura-t-id Amar Tafat