YUSEF-U-QASI IMFELSEF

Seg Yusef-U-Qasi(ar da) i tebda tmedyezt taqbaylit syen akkin yiwen ur yeẓṛi, kra ur d-iqqim di ymedyezt taqbuṛt, tečča-tt tatut.

Tajmilt i umedyaz ameqqran Yusef U Qasi n At Jennad hat-a uẓekka-s, di Tfuɣalt ɣef tewwurt n taddart n At Gwaret, yettumḍel di 1770, di tɣiwant n Tmizar, win yebɣan ad t-id-izuṛ. Tigna-s di talwit. Tajmilt fella-s d tameqqrant. Asefru d amecṭṭuḥ i d-yefkan tigzi d yimenzayen(les principes) n dda Yusef:

Ciṭṭuḥ nettɛeddi fellas
A w'ibɣan segs yimɣur
Ma d aṭas ur t nettaǧǧa
Amer w'iteddun meɣrur
----------------
Voir isefra n Yusef U Qasi: https://youtu.be/t5Y-HueRpiM

D anwa i d Yusef-U-Qasi?

"Yella d yiwen n umedyaz amussnaw yeddren di tallit talemmast yezrin, azal n 2 n tmiḍwin d uzgen aya ". (Tura wḍen-t 3 tmiḍwin). Akka i nnan imɣaṛen-nneɣ. Ma yella d agad yuran fell-as yakan yecban, imeqqṛanen am, Lmulud n At Mεemmeṛ, dɣa netta yenna: "Yusef U Qasi yella di tamiḍi tis 18, leǧwahi n 1770 i yewweḍ asuref n Yillew" Meḥsub send a d-tadef Fṛansa tamurt n Lezzayer, mazal d Aṭeṛkwi i iḥekmen tamurt. Yusef yedder asmi ttnaɣent teqbilin d tudrin n Leqbayel ɣef izuɣaṛ wagar-asent, akk d Wat Qasi n Temda Leblaḍ yellan d adabu n tallit. Netta imir nni iban-d am yiṭij ɣef tlufa s tmedyazt-is, d tebɣest-is, d tmussni-s. D yiwen n umedyaz yessefruyen amenddayer ger ifassen-is, ad yewet kra n tikkal fell-as a d-yebru i-tmussni(yaεni, asefru yennumken). D yiwen n umedyaz yessεan aswir di tmussni, acku yessεa iswi s isefra-s, mačči d ameddaḥ kan.

YUSEF U QASI D IMFELSEF

Yusef U Qasi d imfelsef¹ di tallit n wakud i deg yella, di tallit n17 sdat MƐ, isefra-s d yigan yemhel, tesutur-iten-id tfelsuft, deg uṣaduf-is. Imfelsef¹ d yiwen n umkan εlayen, iweεṛen, i d-yessuturen igan² yemgarrden, ur yelli d yiwet n tɣawsa kan, neɣ d aqeṣeṛ. D aselmad deg yigrawen, d aḥeddad n wawal, yessefra, yefra ger teqbilin, d laεṛac d tudrin. Tuttra is tefkiḍ ad ak-d-yerr fell-as, mačči da yeshel "ih", da yewεeṛ "ala". D netta i ttwakilen At Jennad akken ad-yemmeslay fell-asen sdat unbaz Aṭeṛki, d uḥkimen n At Qasi. Am akken At Yanni yellan d lεeṛc, refdent s igenni, ɣef wakken i tessεan d amεiwen, di yal tagwnitt n cedda, yella, am wakken nezmer a d-nini di tallit n Yusef U Qasi, At Yanni ufraren-d di tmetti taqbaylit s leḥdaqa d tmussni, d tḥirfatin n tneḍi³.
Ihi Yusef d netta i d azref n ugdud, d netta i yesmeɣren tazmert-is. Aswir-is di tmussni meqqer, ur yessεa amedya, tarrayt n tfelsut-ines⁴ tezra igan ur nelli d menwala, iles-is d wallaɣ-is ur ssεin tillas, am asif mi ara yeḥmel, ayen i d-yemmugger yewwi-t. Ladɣa yenna-t-id deg usefru-ines "lwadd lḥeṛṛac". Ẓṛet adlis n Dda Lmulud Mεemri "Isefra n Teqbaylit Iqbuṛen".
————
Amawal
1 philosophe
2 actes
3 artisanat
4 philosophie

MUḤ AT LMESSƐUD NETTA D YUSEF-U-QASI
Yiwen umedyaz n At Yanni qqaren-as Muḥ At Lmessεud, yella di tallit n Yusef-u-Qasi, yettqaddaṛ Yusef nezzeh. Yebɣa Muḥ at yesselmed Yusef di tmedyezt. Yiwwas yetter-it s usefru, Yusef yerra-yas tiririt s usefru, s tmeɣrut iεedlen.

Yenna-yas Muḥ At Lmessεud

A dda Yusef ay ungal
A yixef llehl-is
Tecbiḍ ṭaleb llersal
Yeɣɣran di Wedris
Fell-ak ul-iw d ameεlal
Anwa ik yessεan d ccix-is

Yerra-yas Yusef, yenna-yas

Cubaɣ w'ur nekkat uzzal
Yecmet waggus-is
Am win irefden uffal
D win i lleslaḥ-is
Neɣ afṣiḥ deg lmital
Ur nessefruy deg ixef-is

Anamek yenna-yas Yusef, tigzi ur tettnuz ara, tamedyezt ur tettwalmad ara, yili medden akk ad uɣalen d imedyazen. Zemmreɣ kan ak welheɣ.
——————
Yettwakkes-d deg /Isefra n Teqbaylit Iqbuṛen/yura dda Lmulud Mεemri

YENNA YUSEF-U-QASI

D ul-iw i d ccix-iw
Abrid iɣer inh'ar t-aɣeɣ
D ul-iw i d afrag-iw
Abrid ɣef i iḥudd ttixṛeɣ

Tasuqilt/ traduction

Mon cœur est mon guide
La voie qu'il m'indique je la suis
Mon cœur est mon mentor
La voie qu'il m'interdit je la fuis.