Di ṛemḍan tettbeddil

Di ṛemḍan mačči am ticki deg učči(di lefḍaṛ); di ṛemḍan medden ttεeziṛen deg iḍ, irgazen labaεda, di leqhawi tturaren luṭu (d ddiminu, d lkaṛṭa) alama d sḥuṛ, i syen akkin ṣbaḥ ur ttenkaren ara alama d azal, ṛemḍan yelha kan deg imuras.

Aqli nek ur ttεziṛeɣ ara, ass-a kkreɣ-d taṣebḥit ṣubbeɣ-d ar temdint n Suq Lḥed n tɣiwant-nneɣ, medden ṭṣen akk, kra kan n imexḍa i d-ttmagareɣ deg ubrid, tamdint texla, uma d ikumiṛsiyen ɣef 9t ur kkiren, ula d yiwen ur yeldi tawwurt-is.

Alama d 10t d tasawent ahat ara yebdu zzhir n medden d tkeṛyas, tura attan d 9t tessusem teswiεt. Di 11t d tasawent, ad twaliḍ medden daxel n ifuṛguyen, la d-tteffɣen s iqeṛwiyen deg yufus, abrid ɣer tḥuna, ikumiṛsiyen umren mačči d kra, ɣas ma selεa tuli, medden qeṭṭun s taččeṛt n iḍellaεen, ma d igellil yettawi tamuɣli s wallen. 

                                  A. T