Tamacahut n sin watmaten

Yiwet n tmacahut i d-ttallsen zik

Yiwet n tmeṭṭut tessεa mmis akked d urbib-is, d abujil teǧǧat-id yemmas. Ihi tettṛebbi-ten, maca tessemgarred gar-asen aṭas.Mmis-nni tettbuddut nezzeh, ma d arbib-is, ayen tufa ad as tefk. Ihi mi ttinigen ar tyessawt, tettak-asen tiqṛiṣin n uɣrum d iniɣman s waεzal, mmis-nni tettak-as taqṛiṣt n yirden, arbib-nni tettak-as taqṛiṣt n ugercal. Yiwwas mi d-sersen ad ččen, nutni qqimen tama n umdun, setten ttmeslayen. Yeṭṭef ubujil-nni iqceṛ n uɣrum-nni n ugercal iḍeggeṛ-it ar daxel n umdun, ur yezdir ara, yufrar-d s ufella, acku agercal fesus, mačči am yirden neɣ am smid. Yenna-yas urbib abujil:

— Twalaḍ a gma iqceṛ-ina amek i d-yufrar s ufella n waman?

Inna-yas gmas

— Walaɣ-t

— Ihi akihin i d-ufrareɣ deg ul n yemmak

Inna-yas gmas

—Amek ? Ur fhimeɣ ara !

Inna-yas urbib

— Ḍeggeṛ tura kečč iqceṛ-ik n uɣrum n yirden, nuba-k

Iḍeggeṛ gmas iqceṛ-is n yirden ar daxel n umdun, iqceṛ-nni n uɣrum n yirden yezder. Inna-yas urbib

— Twalaḍ a gma amgirred yellan. Akihin i tzedreḍ deg ul n yemmak

Inna-yas gmas i urbib

— Ihi imi akka, yal ass ad ntett s uεdal, ayen i d-newwi ad t-nečč deg sin. Ma d nettat, fiḥel ma teẓṛa. 

Seg wassen akken i ttagan, armi d asmi wwḍen d irgazen, zdin am yiwen. 

---

http://idles20.canalblog.com/