Tamuɣli meqqren-asefru-Amar Tafat

Asefru n timmuɣnest uriɣ ɣef tmagit d tutlayt n tmaziɣt, deg useggas n 1990, sawleɣ-t-id aṭas iberdan deg temliliyin n yidles, d ṛadyuwat n tmaziɣt. 

Beddeɣ sakdeɣ
Ttwaliɣ tamurt
Ttnadiɣ ad ẓṛeɣ
D acu i d tameddurt
Deg wallen ẓeṛeɣ
Ttwaliɣ tagut

Tagut mi d-teffeɣ
Tḍall-d ɣef tmurt
Yewwi-tt-id waḍu
Aḍu n tillas
Tillas d waḍu
Yak ṣebṛen fell-as
Wa yuder, wa yuli
Wa tḥuzz-it, wa yekna-yas
Ar ass-a ur iẓṛi
Tafat ur d-tban fell-as

Yeqqar nek ẓṛiɣ
D acu i d tisas
Netta yettluɣ
Di temda n tillas
Ur yessεn iseɣ
Ur iẓṛi anta i d yemmas
Yemmas d tamaziɣt
Iḍeggeṛ-itt yunef-as
Ur s neqqar tanemmirt
I umdan amesas
Yunag ur ifaq
Yewwit waḍu
Deg iles ittuεelleq
Ur iẓṛi anda iteddu
Nekni sɣur-neɣ
As nehdu asefru
Deg imir ur nḥemmeq
Ass-nneɣ ad t-naru

Sɣur: Amar Tafat, aseggas n 1990