Tamedyezt, sɣur Alaoua Rabhi

Alaoua Rabhi d aselmad di tesdawit n Bgayet, d amnadi, d amedyaz, nlemmed ɣur-s tamsirt d wawal n tmaziɣt, nessarem-as teɣzi n tudert.

                     <><><><><><>

"Tira-nneɣ akken ad tisdid, ma d azelmem d userwet..."

Tamedyezt yessden

Sɣur Ɛelawa Rabḥi

Ttmeslayeɣ i win yennan 

D inzi neɣ ma d asefru 

Γas d imɣi war asennan 

Mi t-tenniḍ yeddem-it waḍu 

Ma sawḍen-t wid i t-yecnan 

Bab uɣanim ad t-yaru 

Ma meslayeɣ i at tira 

D asḥissef kan ay imru 

Seg win yeṭṭfen tisura 

I wugur yugi ferru 

Yerfa mi 's-tenniḍ kra 

Tuccḍa yug' ad as-yebru 

Annaɣ a Ccix smuzget 

I wawal ma yuɣ-d abrid 

D isumar-nneɣ snubget 

Tira-nneɣ akken ad tisdid 

Ma d azelmem d userwet 

Yif-iten usemsel, d ummid 

I tsutwin yelha usummet 

Yefran azeṭṭa d yiẓid 

Lemmer ttafeɣ ad urareɣ 

Deg unnar n yimeqqranen 

D aluf, ur as-zmireɣ 

Yessufuɣ-d ijeɣdanen 

Γer daxel ay ul ara rreɣ 

D asaḍuf n yimdanen 

Urgaɣ tezziɣ-d i takurt 

S ufella ay d-ttferfireɣ 

Allen-iw walant yal tamurt 

Amzun d afɣul, ugareɣ 

Ziɣ tkellex-iyi tmeddurt 

Deg temda yibezḍan zzreɣ 

Lemmer yal yiwen ad iger 

Talqimt almend n yimi-s 

Lemmer s wannuz ay nedder 

Yal yiwen ad yewzen tidmi-s 

Ur as-nkess i yiger 

Ur nettarra iri deg (yi)dis

Ɛelawa Rabḥi

Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.