Tamacahut: Ameddakel iṣeḥḥan

Tamacahut-a, d izen n ttṛebga d tmussni. Kkseɣ-tt-id deg yiwen udlis yura yiwen n Ufṛensis*, netta yura-tt s usikkil n usmeckukel, nek rriɣ-tt-id ar tmaziɣt n wass-a, i wakken ad tishil i imeɣriyen yessnen tamaziɣt.

Ameddakel iṣeḥḥan

Yiwen n umɣar i zman amezwaru, issεa kuz(4) n warraw-is. Kṛaḍ(tlata) meqqerit: ssnen medden. Yiwen d ameẓyan, ur issin ḥeḍd. Amɣar-nni ɣur-s yiwen n umeddakel di ddunnit.

Nnan-as warrraw-is "nekni ɣur-neɣ imeddukal aṭas" — Inna-asen : " imeddukal-nwen ur nfiεen ara. "  Inna-asen: " ɣur-i yiwen n umeddakel yif imeddukal-nwen irkel!" Nnan-as : "d lεali, gerzen imeddukal-nneɣ." — Inna-asen: " ad nuqqem yiwet n temsalt d tigawt. Ad nazen i imeddukal-nneɣ; anwa ara d-yasen ad iḍebbeṛ fell-aɣ." Nnan-as: " Acu n temsalt?" — Inna-asen: " Awit-d yiwen n ikerri ad t-nezlu." Ṛuḥen. Uɣen-d yiwen n ikerri s εecṛa dduṛu. Zlan-t, rran-t ɣer tesga. Dlen-t s yiwen n ucetiḍ. Inna-as i umeqqran deg-sen: " Ṛuḥ tura a mmi ar imeddukal-ik swayes tettzuxxuḍ, inn'asen a d-asen. Ad neẓẓeṛ tura ma ad tafeḍ ma yella win ara d-yasen ad iḍebbeṛ fell-ak." Iṛuḥ mmis-nni, inna-as: "A baba acu n lmaεna ara sen-iniɣ: ad tḍebbṛem fell-i?" — Inna-as babas : " Inn'asen: Aqlaɣ nenɣa yiwen n imekṛeḍ iḍelli. Amek ar as-nexdem?"

Iṛuḥ mmis-nni ɣer imeddukal-is, inna-asen : " Ay imeddukal-iw, aqli nɣiɣ yiwen n imekṛeḍ iḍelli. Tura εawqaɣ amek ar as-xedmeɣ. Ma yella kra ara tḍebbṛem fell-i?" — Nnan-as : " Ur nezmir ara ad nḍebbeṛ di tɣawsiwin am tigi." Yuɣal-d s axxam. Inna-as : "A baba, ur ufiɣ ara yiwen ara d-iḍebbṛen fell-aneɣ deg imeddukal-iw."

Inna-as babas i wayeḍ: " Ṛuḥ tura kečči-nni ar imeddukal-ik." Iṛuḥ. Ur yufi ara yiwen ula d netta. Yuɣal-d, inna-as : " A baba, ur ufiɣ ḥedd ula d nekki-nni."

Inna-as babas i wayeḍ: " Ṛuḥ diɣen kečči-nni." Iṛuḥ diɣen win-a,  wis tlata-nni. Ur yufi ara yiwen la d netta. Yuɣal-d, inna-as: " A baba, ur ufiɣ yiwen ula d nekki-nni."

Inna-asen : " Yak, nniɣ-awen: Ur ssugutet ara imeddukal. Uqmet yiwen n umeddakel iṣeḥḥan, yif ayen din ur nenfiε ara." Inna-as i umecṭṭuḥ-nni: Ṛuḥ kečči-nni a mmi, ar umeddakel-iw, inni-as : " La ak-iqqar umeddakel-ik baba : eyya, as-d, amek ara nexdem?"

Iṛuḥ uqcic-nni, iwweḍ ar umeddakel-nni n babas, inna-as: " Ya weddi, la k-iqqar baba: nenɣa yiwen n umakar iḍelli. Tura, as-d. Amek ar as-nexdem?" Inna-as umeddakel-nni n babas : " Wellah! Ard εemmṛaɣ takaṛabilt-inu. Ula d nek as-rnuɣ tiyita-inu deg-s." Iṛuḥ-d, idda-d akked uqcic-nni. Iwwi-d takaṛabilt akked-ides.

Armi i d-wwḍen, inna-as : " Acu ɣef, i d-tuzneḍ ɣur-i, ay ameddakel? " — Inna-as : " A weddi, nnɣan warraw-iw yiwen n umakar. Tura uzneɣ-ak-in ad tḍebbṛeḍ amek ar as-nexdem." Inna-as umeddakel-nni-ines : " Anda yella? Ad rnuɣ tiyita-inu deg-s." —Inna-as " Atan i tesga, idell s ucetiḍ."

Iṛuḥ ɣur-s, irfed-as acetiḍ, yufa-t d ikerri. Inna-as : " Ay ameddakel, wagi d ikerri aya." — Inna-as : " Ihi, d ikerri i zzliɣ. Bɣiɣ ad teččeḍ deg-s. Ceyεaɣ-ak-in fell-as bac ad d-taseḍ ad teččeḍ deg-s."

— Inna-as : " Ihi, nekki-nni usiɣ-d ad ḍebbṛeɣ. Γilaɣ d bunaddem i tenɣam ; ad t-nawi ar lebḥaṛ deg iḍ, neɣ ad t-nemḍel deg iḍ, neɣ ad t-greɣ deg walebεeḍ iɣezran bac ur isell yiwen. Imi d ikerri i d-ufiɣ, Lḥemddulah,  imi d lxiṛ i yellan."

Eččan ikerri-nni. Iṛuḥ urgaz s axxam-is

Inna-asen umɣar-nni i warraw-is : " Yak, nniɣ-awen: ur tessεim ara imeddukal ar ad kwen-iselken di tegnit n lhezza." — Nnan-as : "S tidett, a babatneɣ, d kečč axiṛ-nneɣ. Tenniḍ-aɣ : ur ssugutet iḥbiben ur neṣliḥ ara; uqmet yiwen igerzen yif meyya ur nemεin ara." — Inna-asen : " Eẓṛet! Nekki-nni ɣur-i yiwen n umeddakel axiṛ n imeddukal-nnwen irkelli. Ceyεeɣ-as i umeddakel-iw yiwen n umeslay: yusa-d ittazzal. Wamma kunwi tṛuḥem irkel, si yiwen ar kṛad(3); ar imeddukal-nnwen; ur d-yusi ula d yiwen!"

Amar Tafat

* Tettwakkes-d deg udlis "Timucuha n tmurt leqbayel" yura, i d-ijmeε AUGUSTE MOULIÉRAS