Amek iwata ad as-neg

Amek iwata ad neqdec ɣef tutlayt-nneɣ

Ad nkemmel ad neqdec am wakken igerrez mačči drus, neɣ ciṭṭuḥ kan, wid isefcalen ur asen-nettḥessis ara, ur ten-nettεanad ara. Ad nawi abrid n tutlayt n tyemmat, ad t-nṣeggem, ad t-nesnerni ugar, ulac win neɣ tin izemmren ad aɣ-yekkes, wid ibɣan ad aɣ-sqluqlen nneya, neɣ ad aɣ-sxeṣṛen, nekni nuɣ taɣumi d trugza d tezdeg, ur nezmir ara ad nbeddel abrid seg wayen igerzen ɣer wayen n ddir, ur nessεi azal. Neẓṛa belli tira n tmaziɣt akked d tmedyezt taggara-a ttcawafen fell-as tuget n medden, llan wid yeffɣen deg-s, uɣalen am widen i tt-id-issikiden s tmuḥqṛanit d yir tamuɣli seg zik. Skud yella uzbu, ad nettkemmil tayerza, tuffɣa deg uḍṛef ulac, tuffɣa deg unnar ulac, alama tuzdag neεma, ma terwi maḍi, nekni ad nesbedd aqerru s wayla-nneɣ, fiḥel ma nemter-d ɣer wiyaḍ. Terbeḥ neɣ texṣeṛ d tutlayt-nneɣ ayen-nni.

Nniɣ-as diɣen :

Yaεdel win i d-ittarun yal ass s tmaziɣt, s tira zeddigen war tuccḍa, d yisentlen ara inefεen tutlayt d yedles, neɣ d win irban ifassen-is deg irebbi xuccen? Mi as-tenniḍ acimi tagi akka?  Ad ak-yini : «ula d kečč acimi ur d-terriḍ ara i teɣri ? » Nek ɣileɣ llan yimyura ttwassnen dagi, llan imeɣriyen d tmeɣriyin, ad lemden ɣer imura i d-ittarun s tmaziɣt. I syen akkin yal yiwen s wazal-is. 

Iwata ad nẓeṛ ma nega azal i wid iseqdacen tutlayt am wakken nega mraw n wazalen i tutlayt, acku d nutni i d allaɣ-is i d tafekka-s.

Yiwet n tikelt :

Yenna-ak yiwwas yiwen n umeddakel, netta d ahwawi.

— Mi ara slleɣ i umendayer d ugiṭaṛ ttciṛṛiwaɣ

Nniɣ-as nek

— S tidet yelha maεna ur ttciṛṛiweɣ ara. Am akka i d-teqqaṛeḍ. Nek, ayen iyi-tt-ciṛṛiwen, mi ara selleɣ i usarag s tmaziɣt sɣur kra n imussnawen imeqqranen n tmaziɣt. Amedya Dda Lmulud Mεemmri. Neɣ mi ara ɣɣreɣ kra n udlis n walebεaḍ n imussnawen yura-t-id.

Yenna-ak netta

— Yal wa d anda i t-sersen a mass! Yal wa d taɣawsa i t-ittqenniεen

Yuɣal nniɣ-as

— Ur teẓṛiḍ ara aεni llan idlisen s tmaziɣt?

Yenna-k am wakken ttmeslayen izemniyen

— Ur ɣɣriɣ ara! 

Nniɣ-as

— Ihi d aymi ...

Ayen nettidir

Llan widen ixedmen, llan widen i d-ittallsen d acu xeddmen wiyiḍ. Ayen txedmeḍ ad uɣalen ad t-id-allsen igad terza temsalt.

Sɣur Amar Tafat

https://www.facebook.com/amar.tafat.14?mibextid=ZbWKwL