Tutlayt ma nbedd ɣur-s

Γurwat ur ɣeflet ɣef tutlayt Tamaziɣt amer ad tenger

Yenna-ak yiwen

— Acimi ayen tettmeslayeḍ akken deg ibidyuten-ik?

Nniɣ-as

— Lxiṛ ncallah

Yenn-ak

— Tin-a mačči d Taqbaylit, d tacelḥit. Ḥemmleɣ ak-sleɣ, maca yella wayen ur fhimeɣ ara deg wayen i d-teqqareḍ.

Nniɣ-as

— D Tamaziɣt s wayes ttaruɣ i d-sawalaɣ deg ibidyuten-iw. Tura ma d awalen ur tegziḍ ara, awal ur tefhimeḍ ara, ini-id ad ak-y-id segziɣ.

Yenna-ak

— D acu i d iswi-k laεnaya-k?

Nniɣ-as

— Tura ad ak-d-sfehmeɣ. Esel-d kan ma ɣur-i azref

— Yenna-k

— Ih, aya meslay

Nniɣ-as imir

— Menyif ad meslayeɣ s tutlayt n Tmaziɣt tazedgant, ɣas kra n wawalen mazal ur ten-fhimen ara medden, acku mazal ur uzzilen ara di tmetti Tamaziɣt, wala ad utlayeɣ s tutlayt ixelḍen d tutlayin nniḍen, tutlayt-iw ad as-ṛuḥen ayen din n wawalen-is. Imdanen imaziɣen mačči d ugur ɣur-sen annect-a, ɣas yiwen ur yefhim ara 5 wawalen deg uḍṛis, izmer ad yuɣal ad ten-yegzu. Ihi wata ad as-neddu akka s umata i wakken tutlayt-nneɣ ad tbin d tutlayt ikemmlen am tutlayin, mačči d lxali. Llan imawalen n Tmaziɣt ara neseqdec, ad nernu ad nefk tameẓẓuɣt, ad nenadi s immal ad d-nettmagar imdanen yesnen tutlayt. Di ddunnit-a akken terriḍ iman-ik ad tezgeḍ akkenni, ma tbeddeḍ ur ittxaṣa kra, ma tesehzaḍ ad ak-yawi wasif. Ihi iwata ad nbedd ɣer tutlayt-nneɣ am wakken d iman-nneɣ, ur nettarra ara timsal meqqren sehlent.