Amezruy n Yennayer - sɣur Amar Tafat

Tigemmi

Yennayer n yimaziɣen - jour de l'an berbère

Send ad d-awiɣ awal ɣef Yennayer, iwata i wakken ad rreɣ tajmilt i yimeɣnasen n Tmaziɣt i aɣ-yeǧǧan, fell-asen talwit s umata : seg Bulifa, ɣer Belεid At Aεli, Lmulud n At Mεemmeṛ, Tawes Ɛemṛuc, Muḥend Aεṛab Bessaεud, Amar Negadi, Lmulud Ferεun, Lwennas Maεṭub, Yidir, Meksa Abdelkader,  artg... 

Tisbeddit n Cacneq di temdint n Tizi Wezzu

Di tazwara, i wakken ad d-awiɣ awal ɣef Yennayer, iwata ad sɣezeɣ i wakken ad awen-d-iniɣ ansi d-ikka, d wamek i d-yella, anwa akud.  style="text-align: left;">Ihi Yennayer yekka-d seg tuṭfa tamezwarut n udabu ageldan n Imaziɣen di tmurt n Maṣeṛ di 950 send Mass Ɛissa, ɣef yixef-is Cacneq Amaziɣ, di tgelda tis 22, ar deqqal n tgelda taneggarut n Iferεunen.

Γef tgelda-agi, Cacneq yega tameɣra tameqqrant yecban ttebyita, isečč s seksu d uyaziḍ deg wass amenzu n useggas 1 di Yennayer. Imaziɣen n Tmazɣa s umata umren s tgelda-agi tamezwarut n Imaziɣen, umren s tmeɣra-agi yega Ucacneq, ihi rran-tt d ansay tettuɣal-d yal aseggas, yal amenzu n Yennayer.

Γur Icawiyen ass umenzu n Yennayer qqaren-as "ass n Umaziɣ", yeεni ass n Cacneq. Amar Neggadi d Acawi, d agag iceɣlen d ineḍṛi-agi, yura ɣef Yennayer d uwatay Amaziɣ, yerna-as azal, yesekfel-d aẓaṛ-is, igerrez-it, tajmilt fell-as ur t-ttfakka. Yenna-d "amezruy n Yennayer yebda-d seg Cacneq amaziɣ, asmi yeḥkem di Maṣeṛ di 950 send Mass Ɛissa. Di tgelda tis 22, ar deqqal n tgelda taneggarut n Iferεunen.

Send ad yeḥkem Cacneq s wudem n tgelda, Imaziɣen n Tmazɣa llan ur sεin ara ṣenf n leḥkem-agi n tgeldiwin, maca llan ḥekmen am wakken ḥekmen leqbayel zik di tallit n Yusef U Qasi, ḥekmen s leḥkem n teqbilin d laεṛac, d tudrin d iderma. 

Cacneq seg tama-s n tmurt n Libya, n lεerc Mcawcen. D yiwen wergaz iẓewṛen, d amusnaw, d aḥeddad n wawal. Yebda leḥkem di taddart, yuɣal ar deqqal d aqerru n lεeṛc-is. Yesεa lwasila di Maṣeṛ, ittemselḥu yid-sen, yerna d imidawen. Ihi yuɣal yekcem ɣer Maṣeṛ gar iferεunen, yekcem di teṣṛeḍṭ-nsen Amon, yuɣal d ccix ameqqran di teṣṛeḍt-agi, am wakken llan Imaziɣen ikecmen ɣer Maṣeṛ. Yuɣal yudef deg yigen n Iferεunen. Zik Maṣeṛ tufrar-d s tɣerma d yidles, d Tsartit. Cacneq yekcem di tsartit n wakud-nni, ihi s wannect-a, ixeddem ixeddem, yettṛaεi, yettaẓ ɣer zdat, armi i d-iḥella tagelda-agi armi d asmi yemmut, baqi d igelliden Imaziɣen i yettkemmilen di leḥkem azal n 200 n iseggasen. Tura baqi gran-d Imaziɣen di Maṣeṛ, abaεda amkan i wumi sawalen "Amda n Siwa". Syen i d-uɣalen Imaziɣen. 

Iɣamaṛen i d-ikecmen ɣer Tmazɣa,  neɣ Imaziɣen iḥekmen di Tmazɣa di tillay yezrin, ur sfiḍen ara ansay n Yennayer. Yezga iteddu di yal tallit, wissen ahat yenqes kra deg usfuggel, maca llsas-is yegra-d mi d-yewweḍ Yennayer, yal taddart teẓṛa ass amenzu n Yennayer, ass n 12 deg waggur n Janvier Iṛumyen, ass-n yal amaziɣ di tmurt n Zzayer neɣ di tmura timaziɣin, s tuget di temnaḍin n Leqbayel ttagan imensi lεali s iyuẓaḍ, d seksu d useqqi bu sebεa isufar. Ayaziḍ zellun-t ɣef umnaṛ n tewwurt. Llant temnaḍin isfuggulen Yennayer s yeḥtufen nniḍen s nnig "seksu d uyaziḍ", llan wid irennun aḥeddur, tiɣrifin, d waṭas n tgella ẓiden. Rrennunt daɣen urar tlawin di lḥaṛa, arrac suturen "tamellat n tezwiq" deg iḍ deffir imensi, ttagan "buεfif", d kra n ttewṣifa n umɣar s uččamar, i d-xeddmen gar-asen. Am wakken daɣen cennun, ceṭṭḥen.

Yennayer deg isem-is, d aggur amezwaru deg useggas, am netta am fuṛar, am meɣres, am yebrir, artg... Yennayer d aggur amezwaru deg uwatay amaziɣ yersen ɣef tfellaḥt, yesεa 12 n wagguren, yesεa 4 tisemhuyin : tagrest, tafsut, anebdu, lexṛif. Yesεa tisbaεtin, yesεa iwellihen n wuẓẓu deg useggas sɣur kra n ifellaḥen imusnawen, yal tasebεet s yisem-is, am " iwǧiben, aḥeggan, leḥsum, artg.." Imir asfuggel n Yennayer sɣur Imaziɣen ad naf yers ɣef usfillet ɣer rezzg, ɣef waman i wakken ur ttxaṣan ara, i wakken ad teget lɣella. Akka i d-nufa sfuggulen-t imawlan-nneɣ d lejdud-nneɣ. 

---

Anṣuf s tirza-nwen ɣer ublu-inu! Ǧet-d awennit d asebɣes. Merci de visiter mon blog ! N’hésitez pas à laisser un commentaire.