Dda Lmulud n At Mεemmeṛ amussnwaw n tmazɣa

Tamussni tahrawant

Lmulud n At Mεemmeṛ, neɣ, Mouloud Mammeri

Lmulud n At Mεemmeṛ, neɣ Mouloud Mammeri, illul ass 28 dujembeṛ 1917 di taddart Tawrit Mimun deg At Yanni agezdu n Tizi Wezzu.  azemz usmekti n tmetant-is ass n 26 di fuṛaṛ 1989. D asullef i wakken ad as-nerr tijmilinn s tira neɣ akken nezmer.

Ayen akk i d-yura, neɣ id-yenna Lmulud n At Mεemmeṛ aṭas n medden i as-yeslan, gar umassan d umusnaw, d umdan aḥerfi, maca imuhal-is ur sεin ara tamtilt, ufraren s uswir εlayen. Dda Lmulud n At Mεemmeṛ mačči kan d kra, maca d tasdawit(Mouloud Mammeri c'est l'université), ladɣa tin n Tizi Wezzu terfed isem-is d ayen yuklal, d ticṛeḍt ara d-ismketyen wid ur t-nessin, d wid yebɣan ad tali tussna. Ayen yexdem s umata ur yeffir ara, mazal wid ara t-yeɣren di tsutwin i d-iteddun, imi ayen

yexdem d ayen yellan d anmeẓlan(cohérent), yuɣal am wakken d ureɣ, "ɣas yumes aɣebbaṛ ad tezwiḍ ad ittiriq, ur t-ttagadeḍ ara fell-as, ma yeffeɣ-d kra ad ittucellef", imeslayen icebḥen yezgan deg iles-is d tirawin-is. D wa i d amahil ḥemmleɣ. Ayen ara d-yeffɣen ɣer zdat, ur t-ttqelliqeḍ ara i wakken ad t-iskerkes walebεeḍ, maca d lǧehdd ara d-irnu d tejmilt d waffud, acku d imuhal yesεan llsas, yersen ɣef tidet, i yega umassan n Tmazɣa. U ayen yexdem yeqqen ɣer tikti n izerfan n tmagit, d tutlayt n Tmaziɣt d tgemmi-nes d yidles-is, d tmetti. Belli, tutlayt n Tmaziɣt d tutlayt am tutlayin, ad tettwaselmed, ad naru yiss idlisen, ad d-nesnulfu yiss, idles amaziɣ d amaṛkanti. Atan tura tettwalim newweḍ ɣur-s. Dda Lmulud d aggag(intellectuel), d imfelsef(philosophe).

Γas rnu-d Yusef U Qasi d Si Muḥend U Mḥend, d Ccix Muḥend U Lḥusin, di taɣult n tmedyezt. Iwεeṛ iwakken ad d-tafeḍ imedyazen ara iɣummen imedyazen-a iqbuṛen, ɣas kkren-d, nulfan-d wid iẓewṛen, nutni ayen i d-nnan s wazal-is, sser-nsen ad d-iqqim i lebda ur ten-ittcellif kra, medden ad d-dellun ɣur-sen, imi uɣalen d tigemmi. 

Dda Lmulud n At Mεemmeṛ, isem-is yeqqim-d ur yella d awal kan, maca yella wayen ara yaf umdan ad t-id-ilmed deg imuhal-is, d yinan-is. Imuhal-is, d idlisen i d-yeǧǧa, innan-is, d isaragen d teywalin i d-isawel, d tdiwenniyin yexdem akked imasanen, send ad yaweḍ s anda ara naweḍ s umata. Fell-as tajmilt tameqqrant ur nettfaka, iziɣer-is ad yili di talwit.

Sɣur Amar Tafat

---

Anṣuf s tirza-nwen ɣer ublu-inu! Ǧet-d awennit d asebɣes. Merci de visiter mon blog ! N’hésitez pas à laisser un commentaire.