Tadiwennit akked Madjid Oumnia, amaru ittarun s tutlayt-is tamaziɣt

Maǧid Umnya d yiwen n umaru s tutlayt n tmaziɣt, d ameɣnas s yimru yefkan azal i tutlayt-is, ittaru ula d tasuqqilt. Nefka-yas tuttriwin yerra-yaɣ-d fell-asent, deg-sen taqbaylit tazeddgant, ur t-zegglet ara s tɣuri. Ɣret d acu i d-yenna yal awal s unamek-is.

Tamaziɣt ass-a: Amek i k-d-tusa tikti i wakken ad tuɣaleḍ d amaru? Amecwaṛ-ik s umata 

Maǧid Umnya: Werǧin nwiɣ ad qqleɣ d ameskar, ar ass-a ggummaɣ ad amneɣ iman-iw d amaru, ayagi ahat imi weḥd-i kan i lemmdeɣ. Si zik, seg wasmi meẓẓiyeɣ, ḥemmleɣ ad ɣreɣ kra n umagrad neɣ n

udlis i d-yuran ɣef tmaziɣt neɣ s tmaziɣt. Ttaruɣ i yiman-iw akken ad lemdeɣ tamaziɣt, ttaruɣ tizmilin n tɣuri, ggareɣ tamawt d tselleḍt, akk annect-a ticki ɣɣareɣ iḍrisen, idlisen, iɣmisen d wayen-nniḍen. Ma d assufeɣ, seg wasmi lliɣ kan d amastaɣ, ahat imi stufaɣ diɣen.

Tamaziɣt ass-a: Ahat tessefruyeḍ?

Maǧid Umnya:, ur ssefruyeɣ ara, maca ḥemmleɣ ad ɣreɣ tamedyezt. Isfra d yinzan, beqqun akk medden ad sen-slen, imi d ayen yuzzlen aṭas deg wansayen-nneɣ.

Tamaziɣt ass-a: Amek i d-tessufɣeḍ adlis-ik amezwaru? Ahat iwεeṛ-ak ciṭṭuḥ?

Maǧid Umnya: Mačči d adlis-nni uriɣ di tazwara i d-ssufɣeɣ d amezwaru. Lliɣ uriɣ yakan tullisin. Maca, d adlis n tsuqilt i yuran s tefransist, n Isabelle Eberhardt umi tsemma « Les Nouvelles Algeriennes » i d-ssufɣeɣ i tikkelt tamezwrut. Ulac d acu iweɛren mi ara tili tebɣest n tira, d acukan ttilin wuguren deg ussufeɣ n udlis, imi ulac tallelt, dderk akk yettuɣal ɣef umeskar.

Tamaziɣt ass-a: Γef wacu tḥemmleḍ ad taruḍ, d acu n isental i tḥemmleḍ?

Maǧid Umnya: Ḥemmleɣ ad aruɣ ɣef wayen yellan d ilaw. Tekkseɣ-d isental seg wayen yellan d amiran neɣ yezrin, ttaruɣ-ten d tullisin, yerna i yiman-iw kan. Rennuɣ diɣen tasuqilt si tefransist ɣer teqbaylit/tamaziɣt. 

Tamaziɣt ass-a: Acu ara d-tiniḍ ɣef wedlis n tmaziɣt deg unnar n uzenzi? Ma tella tamawt yessefṛaḥen?

Maǧid Umnya: Aḥric n usenzi n udlis amaziɣ d ayen nniḍen, d ugur ameqqran. Yuɣ-itent seg yimɣriyen yuqan aṭas. Ilmeẓyen n tmetti taqbaylit ur ɣɣaren ara, awi ufan imawlan-nsen ad ten-ssebɣasen cwiṭ, ad sen-heggin timkerḍiyin i warraw-nsen. D acukan win i temlek tira ur yessakad ara ɣer wannect-a, akken i yenna ufellaḥ : "lemmer i yesseḥsab, ur izerreɛ ara".

  

Tamaziɣt ass-a: Tikti-inek ɣef udlis n tmaziɣt akken ad yefukti, ad yenerni?

Maǧid Umnya: Akken ad yennerni udlis n tmaziɣt ilaq-as udellel, timkerḍiyin i yellan akka tura ad ččarent s yidlisen, tallelt i yimeskar d usebɣes ɣef tɣuri… ayagi akk mazal ulac-it.

Tamaziɣt ass-a: Amek twalaḍ tutlayt n tmaziɣt di internet? Abrid n internet ahat yesεa abaɣur i wedlis d tutlayt-is?

Maǧid Umnya: Siwa abaɣur ara yilin, imi tettunefk tegnit i tutlayt n tmaziɣt s wallal-agi n umaḍal umḍin i wakken ad teṭṭef amkan am tutlayin akk n ddunit. Maca, ɣer yimawlan-is i tella ma ran ad tennerni, tlaq tira s waṭas deg yizeḍwan inmettiyen, iblugen neɣ deg wanda nniḍen…

Tamaziɣt ass-a: Idlisen akk turiḍ i d-tessuffɣeḍ, yiwen yiwen? Anda ttnuzen?

Maǧid Umnya: D nekk i ten-isrusuyen di tnedlisin. Diɣen di tmesriyin ticki llant. Ma d aznuzu s ttawil kan, akken qqaren : "ssuq s leḥbab, ma sewwqen-d".

Tamaziɣt ass-a: D acu twalaḍ di tutlayt n tmaziɣt deg imira? D acu n yimmal i as-tesugneḍ?

Maǧid Umnya: Ɣef wakken tella tura, txuṣṣ mliḥ, imawlan-is ur tt-ssemrasen ara, ur s-fkin ara azal i tuklal ama di tmeslayt-nsen n yal ass, di tirawin n yigalisin n tḥuna, ladɣa di tedbelt ulac-itt akk artg… maca yelha ussirem.

Tamaziɣt ass-a: Acu ara sen-tinniḍ i wid yettarun s tutlayt n tmaziɣt? 

Maǧid Umnya: Ad sen-iniɣ : ssaɣezfen-as leɛmer wat zik ɣas ur ɣrin ara, ass-a ad tt-nnerni s yimyura, s yiselmaden deg uɣerbaz, wid d tid i tt-yessemrasen yal ass di yal taɣult.

Tamaziɣt ass-a: Acu ara d-tiniḍ ɣef ublug "Tamaziɣt ass-a"?

Maǧid Umnya: D ayen igerrzen, ilaqen di taywalt n umaḍal umḍin. Afud igerrzen a Mass Amar Tafat, ssarameɣ d ayen uɣur ara d-rren ddehn-nsen yimeɣriyen akk i iḥemmlen tamaziɣt.

Tamaziɣt ass-a: Awal n taggara? 

Maǧid Umnya: Imi ɣ-tessefk tegnit, ur issulef ara ustehzi, tanemmirt akk i wid irennun afud i yimyura.

 

—————

Tadiwennit i d-imhel Amar Tafat

Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.