Tasekla am tala

Tasekla am tala

Sɣur Amar Tafat

Wiss-n kan ayen nettaru ma yefṛez kra ɣer wid d tid yeɣɣaren, ma fehmen iswi n tirawtin-nneɣ, sani bɣant ad rrent imeɣriyen. Tasekla am tala, zik-nni neɣ tura, tezga tettazzal s teqbaylit. Di timawit neɣ di tira, llan wid d tid i d-isnulfuyen. Llan wid nessen, nesla-asen, nufa agerruj ɣur-sen, am win yefuden yeswa, neεya newwi-d fell-asen. Am wakken mazal llan, wid d tid ur nessin ara, ttwaṛemlen, maca yiwwas ad ten-id-nessekfel, ad nekkes asigna fell-asen i ten-iɣummen, acku ula d nutni uklalen, win ara ten-yeɣren, ad d-yagem ɣur-sen, ayen teḥwaǧ tmusni d tussna. Nessarem-asen, afud igerzen, am tsekla n Tmaziɣt (Taqbaylit) d wid i tt-iqeddcen, am wid i s-igan azal s umata di tmetti. Ddunnit tezmer kan ad tɣur, wid irewlen ɣef tidet, ma yella ǧǧan ayla-nsen iḍaε, neɣ zeggren fell-as εeggzen ad as-sllen, am widak iteddun deg igenni, s uxayel kan mačči s tillawt. Anwa iḥeṛcen? D win i d-isban wayla-s. Yal tutlayt tesbanay-d wid-is, imi yal agdud ittzuxxu s imussnawen-is, mačči s ijenṭaḍen-is.