Inegzumen - les résumés - sɣur Amar Tafat

«Llan wiyiḍ »

Amkan n usenfali s teqbuṛin d tmaynutin — Awal deffir wayeḍ — Inegzumen d tnebdarin — Amar Tafat - Zger ma tebɣiḍ ɣer 👉🏻 Yizen(message)

---

---

▶ Nettaru i wakken ad as-nernu affud i tutlayt n tmaziɣt, am wakken llan wid iḥemmlen ad d-inin "Taqbaylit", s tsekla taqbuṛt d tin n tetrart. Nek d amaziɣ aqbayli ttaruɣ-d ayen slan imeẓẓuɣen-iw, ama zik neɣ tura, ttiḥmileɣ ad awen-t-id-ssiwḍeɣ, d awal, d inzi, neɣ tanfalit. Kunwi ma tennam-d Tanemmirt, ad awen-semmiɣ "Uḥdiqen yegzan". D acu i d tudert n umdan? Ur iwata ad nerr di tama ayen yellan di Teqbaylit ad t-neǧǧ ad t-neɣden wussan, efk-as tilelli i wawal akken ad ikemmel tiddint di tmetti ideg yuɣ tanumi yettcali, idles yelha ma yeččuṛ alama yettenfal, wala ma nesseɣres-it, neɣ yettban-d yuɣ tiyita.

---

▶ Meskud mazal neǧṛen iεewzen; meskud mazal ssemsaden tiferyin; meskud mazal ssmendagen s isufa, ur ittfaka umennuɣ di ddunnit; mazal ad nettemyenɣa gar-aneɣ. Yiwwas ad msengaren imdanen gar-asen!. — fb Amar Tafat, 29 di meɣres 2022

---

Aman teddun s tɣawalt, ḥemmlen takessart. Teddun si terga ar yeɣzeṛ; seg yiɣzeṛ ar wasif; seg wasif ar yillel; seg yillel ar ugaraw. — Amar Tafat

---

▶ Imdanen ḥemmlen ad dduklen am wakken sεan aswir d tektiwin i ten-isdukklen tikwal mačči akken ttemyafen. Qqaren : «yal wa yeddu d lemtel-is.» Qqaren diɣen : « ulli gganent akken mweεεant.»

---

Ḥekkuɣ lhemm i win ur yuɣ, yettaḍṣa deg lxaṭeṛ-is Ḥekkuɣ lhemm i win yuɣ, iru-ten qbel ad-ten-ruɣ netta d amejruḥ wul-is... — Izli aqbuṛ n teqbaylit

---

▶ Allaɣ-iw yettnadi ɣef tutlayt d yidles, ttakeɣ tameẓzuɣt, am wakken tettreɣ s waṭas. D aymi, m'ur ɣdimeɣ ara kra ur t-id-ttiniɣ ara. Ayen ɣef i ttekleɣ d uɣdim s tumert, ad t-id-siwleɣ srid. S tidet nessεa akk cwiṭuḥ n tibuhelt, maca nek, ur tt-id-sudufeɣ ara ɣer tira-inu. Mi walaɣ taɣawsa-inu, i d-ssuffɣeɣ uzdaget, "anef-as i lehwa ad tewwet!".

---

Tanekra d ṣbeḥ : akka i qqaren imezwura. Llan wid i qqaren : tameddit i qqaren εeslama.. — Awal n yimezwura

---

▶ Imedyazen iqbuṛen yellan di tama nneɣ At Jennad, wid ssneɣ d Wigin-a : Yusef-U-Qasi seg At Gweret(di timiḍi n 17), Beɣdad n Izarazen(deg iseggasen n 40).

---

Ansi i d-nεedda ad d-εeddin, ma nuẓ ar zdat ad aẓen, ma nuɣal timenddeffirt ad uɣalen. Anwa yeẓṛan anda iteddu! Anwa i d uḥdiq? D win yeẓṛan anda iteddu. — Amar Tafat

---

▶ Tikal neqqar s teqbaylit "amdan-ina d ifiṛaεqes", ubayen yewεeṛ ma yeṭṭef-ik. Ifiṛaεqes mi ara twaliḍ, yessεa sin icikkan, am tɣemdin yellin, mi iteddu ad ttɣileḍ ɣef yidis i iteddu, mačči am tɣirdemt. Ihi qqaren deg yiwet n tenfalit, "ifiṛaεqes ma yeṭṭef-ik s icikkan-is, ur ak iberu alama iεeggeḍ-d uɣyul di lebḥaṛ".

---

Mi ara s-inin deg inzi: yewwi-d izem deg umeẓẓuɣ, teẓṛiḍ amdan-nni d cetla n Yugurten. — Inzi n teqbaylit

---

▶Yenna-yak yiwen, ur ẓṛiɣ d acu i d aswir-is : "iwata, d tameslay-agi n ubrid s wayes ara tettarum. Nniɣ-as : "aweddi, tagi n ubrid d abumexluḍ, mačči d tutlayt, deg-s ayen din n tutlayin : taεṛabt abaεda, tafṛensist, tagnizit, artg... Inna-yak : Maεlic! Nniɣ-as : Maεlic ma temmut? ! Yelha ṛay-agi. Yenna-yak : "ala!" Nniɣ-as : "akka i ak-d-nnan. Agrud yessen d acu i tutlayt deg wakud-a, alama iεemmed yiwen. Ma ur teẓṛiḍ ara maḍi, sikked nezzeh ɣer tutlayin ad twaliḍ amek uzdagen". Nniɣ-as : "anef i tmaziɣt ad tkemmel abrid-is, i wakken ad teffeɣ ɣer tafat! Ǧǧ-aɣ si tiεewji-k".

---

▶ Ma tebɣḍd ad tissineḍ alebɛeḍ ma d amussnaw n tidet, wali ma yessen tamagit-is, ma yesseqdac tutlayt-is, ma ur ittzuxxu s tutlayt yellan d tajentaḍt.

---

▶ Taẓẓeyt mačči kan di tfekka, tella uma deg wallaɣ. Yella walebɛeḍ ẓẓay di tfekka allaɣ-is fessus, yella walebɛeḍ fessus di tfekka, allaɣ-is ẓẓay.

---

▶ Ulac taɣawsa ɣef ur d-wwin imussnawen n zik, sawlen-d uma deg umkan n yifṛax...

---

Yenna-yas yitbir: aẓ-akkin aẓ-akkin ma ulac ad iyi-teččeḍ!. — Inzi n teqbaylit

Amawal : Inegzumen: les resumés, anegzum: resumé.

---

_{Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.}