Ur faqeɣ ddunnit tbeddel: asefru sɣur Amar Tafat

Nek yeččuṛen d neyya 
Ttezzin-iyi-d d igwlafen 
Yif-it lemmer d anaẓuṛ i lliɣ 
Ad iyi-ḥemmlen wuḥdiqen

Abrid ɣer yeɣzeṛ d aṛeqaq 
Yuddi-d akk d iqenfuden 
Aman ttazalen di tregwa 
S tezlitt tamecṭuḥt ḥlawen 
Ttnadiɣ ad awḍeɣ asirem-iw 
Ṭafaṛeɣ izirdiyen d wuccanen 
Widak iyi ikeṛhen iḍelli 
Tura rriɣ-ten-id d atmaten 
Ma yella d tiḥeṛci tagi 
Neɣ d tigzi n wuḥdiqen 
Aswir-iw ḥesbeɣ-t yuli 
Nek ur ssɛiɣ ula d iḥbiben 
Llan imdanen ɣef Ṛebbi 
Ifen ula d atmaten 
Kker a ṛay-iw zwir zdat-i 
Siweḍ-d ɣur-i iɛdawen 
Ad ttɣileḍ texla ddunnit 
Neɣ negren di tmurt yergazen

 
Ur faqeɣ ddunnit tbeddel 
Uḥṛicen ttnadin nfeɛ-nnsen 
Amussnaw deg-i yewwet 
Ta d tikli n ibuhalen

 
Iḍellil ttezzin-iyi
Ass-a s igenni refdeɣ-ten
Allen jaɛlent di tafat 
Ur walaɣ tillufa yembaben

Ddunnit turez-iyi allaɣ 

Ttuɣ akk ayen iṣaṛen
Amzun ur ssneɣ ur jeṛbeɣ 
Ugareɣ win iddreɣlen 
Wid yettnadin seqsayen-d 
Ad sen-welheɣ imdewden 
Nek yeččuṛen d neyya 
Ttezzin-iyi-d d igwlafen 
Yif-it lemmer d anaẓuṛ i lliɣ 
Ad iyi-ḥemmlen wuḥdiqen

Amar Tafat