Yusef U Qasi amedyaz n tallit n 17 Sd.MƐ/Uṭṭun 01

YUSEF U QASI AMEDYA N IMUSSNAWEN

TAZRAWT YURA AMAR TAFAT

 

Ma yella rziɣ a d-ssegziɣ, neɣ a d zerweɣ tamsalt n yiwen n umedyaz ameqqran, neɣ amedyaz amezwaru n teqbaylit, Yusef U Qasi n At Jennad, yella di taggara n tallit n 17, leǧwahi n 1770 di tallit talemmast, akken i-t-id-yewṣef dda Lmulud n At Mɛemmeṛ. Si tallit talemmast akkin ɣer teglest, neɣ send-is, ur nufi abziz n usefru n kra n umedyaz yuran s tmaziɣt, ɣas ulama gwran-d kra n yismawen n yemyura n imaziɣen yuran s tlatinit, yecban: Saint Augustin, Juba2, Apulé... I d-yegwran anagar tussna taɣerfant i tettalles tsuta i tayeḍ, yecban tmucuha d yinzan, d isefra n lḥenni di tmeɣṛiwin n at zik, ula d wigi sawalen tura talɣa-nnsen d taqbuṛt, llsas-nnsen kkan-d si tallit talemmast, yella deg-sen yiman n wenbaz Aṭeṛkwi, neɣ n ṭṭṛad mgal Aṭeṛkwi, am...

Ihi i wakken ad yessiweḍ walebεaḍ a d-yaf tura akka, tamedyazt yessefra s umata umedyaz amezwaru di tallit-is n 17, imken d awezɣi, acku liḥala n tutlayt-nneɣ tella yagi ṛqiqet di tillay-is yezrin(n tillas)  n tatlayt neɣ n timawit(oral). Wid iqeṛben cwiṭ ɣer tallit taqbuṛt ufan-d nṣib, am Ifṛensisen: Auguste Moulieras, G.Hanotau, Henri Genevoix, rnu Izzayriyen yecban, dda Lmulud n At Mεemmeṛ, Bensdiṛa, artg... Ladɣa Ifṛensisen agi, d ibzizen n isefra i d-fkan deg yidlisen-nnsen, win yessmeɣren yefka-d kṛaḍ n isefra n Yusef U Qasi, Dda Lmulud yessaweḍ kra n tirrect n wazal n caṛeṭ(30) n isefra yelhan. Acimi? Acku, iban am lemri, imi Yusef yedder aṭas deg At Yanni imezwura, yezdeɣ din-a ɣur-sen armi d asmi yemmut; tis snat Dda Lmulud iluḥeq-d imɣaren iqeṛben ɣer tallit n Yusef U Qasi; u tis kṛaḍ i tent yugaren, yessεa zheṛ, imi Salem At Maεmmeṛ d babas n Dda Lmulud, d yiwen n umussnaw n teqbaylit, d amnadi, d aḥerraz n tsekla taqbuṛt, yessen d igiman n isefra iqbuṛen, abaεda wid n Yusef-U-Qasi, acku d yiwen n umedyaz yettra s waṭas mačči d kra Salem.

Ihi nṣib fellas ad yili akkin d wakka ɣef umedyaz-agi, ad nejbed anamek-is ugar d wugar. Nudaɣ fell-as u-mazal, ayen i d-ufiɣ, d tamedyazt neɣ d awal, uriɣ-ten-id, neɣ ad ten-id-aruɣ, akka w'iddren, ayen i d-yura fell-as Dda Lmulud a t-id nernu ɣer tirrect a t-id nernu a t-id nessken, a t nessali deg wazal acku, ɣur Dda Lmulud uɣur tella terni tameqqṛant, deg wedlis-is "Isefra n Teqbaylit Iqbuṛen" neɣ s tefṛensist "Poèmes Kabyle Anciens". Acku daɣen adlis-a yemluqa, nessarem ad tazzel teẓṛigt-is tikkal nniḍen ugar s waṭas di tmurt nneɣ imi d adlis yessεa azal s waṭas, degs agerruj n tmussniwin tiqbuṛin.

Tikti yugaren tikti, d ccan n umedyaz-a(d wid i t yecban meṛṛa) ma yella banen-ed imuhal-is, d isefra-s d wawalen-is, ma ulin s afell-a. D azal i tutlayt i yedles d uzzal d abaɣur i tmetiyin. Qqaṛen deg yinzi Ifṛensisen "Les grands esprits, cest les grandes nations". D acu kan a-d-nini "anadi n win yessεan zheṛ". Ad εeṛḍeɣ si tama-w d tezmert-iw, akken a d-ffkeɣ ayen i-giɣ fellas si 1990 ɣer dagi, a d-ffkeɣ yiwet n tezrawt yeččuṛen s-umezruy d tmedyazt n Yusef di tallit-is, degs ad yili wayen sliɣ ɣer yemɣaren n waẓi n At Jennad, ɣur kra n yemyura, am Dda Lmulud n At Mεemmeṛ, deg wedlis-is "Isefra n Teqbaylit Iqbuṛen", Auguste Moulieras "Timucuha n Leqbayel", Bensdiṛa deg wedlis n Henri Genevoix "Tudrin n Leqbayel", d wayen yellan meṛṛa fellas.

Ma d ayen uriɣ yagi fellas, ma tufam kra n wanza n imagraden teɣram i d-yeffɣen di kra n yeɣmisen n tmaziɣt, am weɣmis "Tamurt","Izen Amaziɣ", artg... Yettaɣ lḥal, akka i-d abrid n unadi, i-d abrid n tira, ulac aɣawes (lεib) degs.

Ihi tikelt nniḍen, tazrawt agi ad tili s seddis n tneqiḍin ara yili daxel d abaɣuṛ ɣef Yusef U Qasi d tamedyazt d umezruy, mgal amnekcam di tallit-is, d tmussni n tqbaylit:

1)D acu i-d Yusef U Qasi?

2)Yusef U Qasi deg At Jennad

3)Aselmad di Tfuɣalt

4)Azbu n At Jennad mgal Aṭeṛkwi

5)Tamussni d ttmedyazt

6)Taggrayt

 

Deg weḍṛis agi, ma nufa texleḍ tmedyazt n Yusef, maca ad ttbin s kra n iṛecimen n tussna ɣef ansi id-tekka, di taggara n usefru. Ula d awal ma yezzi fellas, yal wa d amek i-d-iweṣṣef Yusef U Qasi deg yeḍṛisen-is.

D acu i-d Yusef U Qasi?

Yella d yiwen n umedyaz-amussnaw yeddren di tallit talemmast yezrin azal n tmiḍwin d uzgen aya ɣer dagi. Akka i nnan yemɣaṛen nneɣ. Ma yella d agad yuran fellas yakan yecban imeqqranen am, dda Lmulud n At Mεemmeṛ, dɣa netta yenna: "Yusef U Qasi yella di tamiḍi n 18, leǧwahi n 1770 i-yewweḍ asuref n Yillew"

Meḥsub send a d-tadef Fṛansa tamurt n Lezzayer, mazal d Aṭeṛkwi i-yḥekmen tamurt. Yusef yedder asmi ttnaɣent teqbilin d ttudrin n Leqbayel ɣef izuɣaṛ wagarasent, akk d Wat Qasi n Temda Leblaḍ yellan d adabu n tallit. Netta imir nni iban-ed am yiṭij ɣef tlufa s tmedyazt-is, d ttebɣest-is, d ttmussni-s. D yiwen n umedyaz yessefruyen amenddayer ger iffassen-is, ad yewet kra n tikkal fellas a d-yebru i-tmussni(yaεni, asefru yennumken). D yiwen n umedyaz yessεan aswir di tmussni, acku yessεa iswi s isefra-s, mačči d ameddaḥ kan.

D yiwen wemdan yessakwayen

Yessebɣas win yuklalen

Yettnemmir amussnaw bu truggza

Isezɣan win iwaεṛen

Yettεayaṛ amesbaţli d wungif, d win yettdarin.

Yettaru imeḍṛa(ad naf isefra-s d amezruy s timad-is).

Yettqaddaṛ Taṣṛeṭ d Lawleyya.

D aselmad deg yegrawen.

Annect-agi s-umata a ɣ d-ibin di kra n yidlisen n imussnawen yuran ɣef yimedyazen n tmurt n Leqbayel. Asmi i d-tudef Fṛansa ɣer tmurt, yiwen umussnaw isem-is General Hannotau i d-ijemεen isefra-s netta d kra n imedyazen abḥal: Muḥ Saεid Amlikec, Lḥaǧ Rabaḥ, Muḥ At Lmessεud, d Yusef U Qasi. Daɣen Dda Lmulud di tneggura agi, yessnerna azal n Yusef d imedyazen-a, yerna-d aṭas nniḍen, deg wedlis-is yura "Isefra n Teqbaylit Iqbuṛen".

         

Ihi amedyaz a t naf d yiwen wemdan inudan tamurt n Leqbayel s-umata, ayagi i-lmend n tdukli d ttegmatt d lxiṛ ger Leqbayel. Yezga deg Gawawen ger At Yanni d At Wasif imi yella wemgirred garasen. Wigi zik d icenga garasen, zzgan d amceččew armi ɣellint tmeggraḍ(llan isefra d inagan yessawel...)

A ṭṭiṛ yufgen iεella

Ifer huz-it

Ḥebsen leǧwad lemḍilla

Ḥedd ma neẓeṛ-it

Assen ur yerbiḥ slam

Mi myuggen ṭṭṛad n twaɣit

Tlatin ḥesbeɣ kamla

Sarden ṣemmeḍ-it

Ay d-iqqimen deg ṭṭwila

Γef teqbaylit

Kra bʷin yeṭṭef ḥedd lɣila

Ičča-ten ṭṭṛad msakit

Ttreɣ-k a waḥed lwaḥid

A Llah ur neṭṭiṣ

Ddaεaɣ-k s ṣḥaba laεyan

Aεli d yiṛfiqen-is

Tegeḍ-aɣ gelǧennet amkan

Jmaε akka d-nettḥessis

 

Maca Yusef yekkat armi i-ten yefra, yessaεdel-iten s webrid n tissulya, akken ur ttuɣalen ara ɣer tid nnsen. Ameḍṛu-ya nnan-d d ayen werǧin neḍṛi, imi Yusef d amussnaw ameqqṛan yessεan tarmit, d amdan bu tḥirfatt. Γef wannect-a yella d anagi usefru yessawel umedyaz ɣef At Yanni d At Wasif:

"Ɛuddu Bellah ya laṭif

A lexbaṛ i d yettasen

At Yanni d At Wasif

Sliɣ s yeḥbiben nuɣen

Ɛuddu Belleh ya laṭif

Temlal ẓebṛa d yefḍisen

Tini i-wid iεebʷjen awal

Acimi teddarayem"

At Yanni zik d uḥdiqen ɣas waεṛen nezzeh maca ɣef izerfan nnsen, maca a naf ttqaddaṛen nezzeh amedyaz Yusef U Qasi ugar n Lawleyya nniḍen, sellen-as, ttaɣen awal-is di tegwnitt iserfen. Γef annect-a yenna Yusef:

Nek d At Yanni grent tesɣaṛ

Nutni inu nek baneɣ nnsen

Nek ur lliɣ d anekkaṛ

Nutni ẓṛan i-d-ttakken

Nek ur lliɣ d anekkaṛ

 

Yerna wayeḍ ɣef At Yanni yenna:

Ḍḥu d lmersul

Belleh, a ṭṭiṛ, ma d wi fessussen

Abrid-ik mellul

Ers i lwadd, zger Iftisen

Sellem εla Ṣṭembul

At Laṛebεa d At Leḥsen

Γur At lmaεqul

Awal n ṣwab At tkemsen

Ur degsen amehbul

Bexlaf w'iḥedqen yessen

Ma ḥabenk s wul

Ma truḍ a k-id ṣeḍṣen

Yusef U Qasi iban d bu taktiwin, yenna diɣen:

Cwiṭ nettεeddi fellas

A w'ibɣan segs yimɣuṛ

Ma d aṭas ur t nettaǧa

Ammer w'iteddun meɣṛuṛ

Ladɣa At Wasif cuffen fellas imi iεuzz aṭas At Yanni nutni ala. Yiwwas yella yekkat deg At Wasif, yusa-d yiwen wergaz yewwet-it-id s wawal iqeṛḥen yenna-yas-d "Ac'i-k-id yewwin ɣerneɣ?"
"Yak tenniḍ-as"

Nniɣ a bab n Sidi

Tlata tuddar nni keffunt

Syen ur zegger sani

Yerra-yas Yusef yenna-yas:

Belleh ar k azneɣ a ṭṭiṛ

Ṣbeḥ zik huzz afriwen

Lembat-ik deg At Yanni

Axxam n lεaz deg Gawawen

I-tlata tuddar nni

Ur yidsent ssεedleɣ yiwen

 

Yusef U Qasi d amussnaw, yessakway medden, yenna:

 

Bismillah a nebdu lḥaṣul

A lḥadeq ttḥessis

Kateɣ lemεani s ṛzun

Sakwayeɣ lǧis

Zεayem i-ten yettṛaǧun

Yessen deg ul-is

Yenna daɣen s tgzi-s d ttmussni-s:

 

D ul-iw i d ccix-iw

Abrid i-ɣer iyi yenheṛ a t aɣeɣ

D ul-iw i-d afrag-iw

Abrid ɣef iḥudd ṭixṛeɣ

Yusef U Qasi di tmurt-is At Jennad

Tteswiṛa tis snat n Yusef, a ɣ d tbin ugar n tmezwarut deg wnamek, imi ma nezrew-it nezzeh a t naf yettemcabi ɣer Nnbi, neɣ yuɣ abrid-is, acku yemhel aṭas ɣef teqbilt-is deg At Jennad, maca ar deqqal yunag s anda nniḍen.

Γur At Jennad Yusef U Qasi mačči kan d amedyaz, maca yella uma d amussnaw. Akka i-yettwassen d aḥeddad n wawal, d bab n ṛṛay, anda tella tεeddawit yefra-tt.

At Jennad d netta i-ttwekkilen akken ad yemmeslay fellasen asmi ttnaɣen nutni d At Qasi ɣef uzaɣaṛ n At Jennad. Belqasem n At Qasi yella d agellid di Ɛemṛawa, maca wagi yesdukkel adabu netta d wemnekcam Aṭeṛkwi. Yella deg wawal "At Qasi ḥekmentt si Tizi armi d Ttizi" Ḥekmentt si Tizi n At Ɛica(Tneya n yimir-a) armi d Ttizi n Wekfadu. Yaεni tamurt n leqbayel s-umata deg yfassen nnsen. Amedyaz Yusef yella yedder di tallit nni n Ṭuṛk, Aṭeṛkwi yellan d anbaz ɣef tmurt n Lezzayer s-umata. Yusef U Qasi di tallit agi yella d yiwen wemdan yukin, ur yeqbil ara ẓẓuṛ n Uṭeṛkwi neɣ n wayeḍ, yeḥseb-it d anbaz ur yelli d ameddakkel am temnaḍin nniḍen.., Yerna yusa-yas-d mgal, yaεya iqubel-it netta d imezdaɣ n tteqbilt-is n At Jennad, asmi yeṭṭenṭun umedyaz(yella umezruy ɣef annect-a, ẓṛet "Azbu n At Jennad mgal Aṭeṛkwi". Ad naf deg wmezruy n At Jennad, nuɣen nutni d Uṭeṛkwi aṭas n tikkal. Ayagi ad t naf deg waṭas n yedlisen n umezruy i-d-ullsen kra n yemyura yecban "José Nil Robin", ladɣa aneggaru ya yulles-ed amezruy akken yessefk, ur d-isedda anagar Yusef U Qasi. Ballak ur terzi ara temsalt n tmedyazt, neɣ ur s taεǧib ara tikti d ttsartit taɣewwaɣt (rebelle)n umedyaz Yusef U Qasi.

Yusef U Qasi yella daɣen deg wakud anda ttnaɣent teqbilin, d llaεṛac d ttudrin d iderma. Netta si tama-s iferru ger wigi, yerna s tmedyazt-is yettweṣif-ed, yeǧǧa-d amezruy n wayen yeḍṛan. Amedya, asefru ya:

Win ur neḥdiṛ

Ass n ttlata mi d tettcuddu

Kul azniq la d-iṭeggiṛ

Kul tiɣilt la d-ttfuṛu

I tin ur yebɣi Ṛebbi

Ɛeddik m'tt neggḥeḍ aẓṛu

Yerna daɣen ɣef ass lexmis, yenna deg wawal-is:

Belleh a ṭṭiṛ ma d w'iserrun

Ddu deg llyaǧ

At Yanni lεez n tudrin

Sellem At waggus meḥraǧ

Ass lexmis mi yasen zzin

Ikker waεjaj

Ibda lbaṛud lexzin

La yettenṭaǧ

Xems'usebεin ay geɣlin

Γef Tewrirt Lḥeǧaǧ

Ar iḍa mazal-ten din

I tembʷeṭṭaǧ

Ɣer tεessast ggaren aεwin

Kul yum d asraǧ

Ulac tifrat yiwen ddin

Γas ma texla neɣ a-tt-ggaǧ

 

Am akken daɣen ara t naf yessεa amezruy yessεan anamek, acku ur yettezzi ara kan di taddart-is, yeffeɣ beṛṛa n teqbilt-is yerna yega aṭas n yigan yelhan. Tagi nenna-d fellas yagi(taqṣiṭ yefra ger At Yanni d At Wasif) maca a d-nuɣal ar deqqal ɣer tiyiḍ.

Deg At Jennad yella d yiwen wemdan yessεan inzer d ttruggza, acku iṛeṣṣa tadukli di teqbilt-is. Deg yiwen wemkan meṛṛa i-ttennejmaεen At Jennad, ṭṭef-itt-id seg taddart n Tmaεsit alama d ttaddart n Ubiẓaṛ, ttennejmaεen akw di Tfuɣalt. Γef waya yenna umedyaz deg wawal-is:

 

Ma nennejmaε di Tfuɣalt

Bu tḥeṛci yawi-tt-id

Ma nennejmaε di Sidi Menṣuṛ

Bu neyya yawi-tt-id

 

Sidi Menṣuṛ yettaɣ lḥal imir d lemqam, am tura, yella degs lǧameε n tẓalit, taqubbett, tella temεemmeṛt, ferrun degs tillufa n imezdaɣ, ferrun di tlawin din-a, yerna tella degs tillumda n leqwran yessɛa aṭas n inelmaden i wumi ssawalen "ṭelba". Ttagan-as ttebyita. Sidi Menṣuṛ qqaṛen "d yiwen n lwali, iǧehden s waṭas n lbeṛhan, yettaǧa amzur iɣelli-d ɣef tuyat-is. Akken i-s-ssawalen "Sidi Menṣuṛ bu wemzur yeddal tuyat". Yezga yettɣima di "Lḥemmam" deg wmadaɣ ddaw taddart n Tmizar deg wemkan isem-is "lxelwa". Netta yella yusa-d di taddart n Iεekkuren, yessεa slid tafunast, armi i d-iṭeṛḍeq ɣer taddart n Tmizar, qublent At Jennad s tumert, fkan-as tawellitt di twacult n At Lhamel. Netta deg wmur-is daɣen yefṛeh s Wat Jennad, nnan-d yenna-yasen: "s-ani tuggadem, erret-iyi tawwurt n tqubbett ɣer din". Gan akken.

Tafuɣalt s wazal-is, d amkan n yedles d ttsartit, d amkan n uɣewwaɣ, din i tettcuddu, din i-ttheggin i-ṭṭṛad mgal Aṭeṛkʷi, neɣ At Qasi, neɣ mgal kra n lεeṛc nniḍen ijewṛen At Jennad.

Nnan yiwwas, Yusef yeba yuɣ-it wakud deg At Yanni, wissen amek i-d-iṣuḍ waḍu, At Jennad niqal kkren ad myebḍun am yirden ɣef lluḥ, yal ajmayεi yessewεeṛ fellas Tafuɣalt, yal wa yeqqaṛ-as: "Tafuɣalt agi tebεed fell-i, wezzaf n tikli". Ihi qeblen, frantt, yal tama di teqbilt ad ttennejmaε deg wemkan-is, kra deg Weɣrib, kra di Tfuɣalt, wiyaḍ deg Wbiẓaṛ, feṛqen akken myeqṛaben imezdaɣ.

Asalli yewweḍ Yusef U Qasi, yusa-d, ijmeε-iten-id ɣer Tfuɣalt, yerra-ten d yiwen akken llan am zik, yerna ad ttennejmaεen di Tguɣalt. Γef talluft-a nnan-d yewwi asefru, yenna-yas:

 

D lεali ssuq!

....

Abiẓaṛ uɣalen d Iflissen

At Laεdeṛ d Izerxfawen

Yegwra-d ........

Ad wteɣ agejdur yissen

Γef wazal n tegmatt d tdukli yenna Yusef deg wawal-is:

 

A llḥemmam a k neceyyeε

Neqqel deg yifeg-ik aεjel

Γer Yezwawen arraw n sbeε

Win yaεran wayeḍ a t idel

Awin yufan bu cwayeε

Ard a s immel

Lḥif n tegmatt yewεeṛ

Yessewṛat ddel

Iεdawen ad ḍebbṛen fellas

Ad fellas sewqen yedder

Yenna daɣen ɣef yinzer d ttrugza:

 

Nek d afṣiḥ d Ajennad

Sɣuṛ Ṛebbi i-d-uɣeɣ isem.

 

Imenzayen n Yusef U Qasi ur ssεin ara amedya, yedda fellasen armi i t semman d adderwic neɣ d aεeṭṭaṛ. Yessdukkel At Jennad akken ur sen ijellu y'ara wakal nnsen ameqqṛan n Uzaɣaṛ, lemmer day ṭṭṣen a-sent ḥewṣen Wat Qasi yellan di tallit nni ǧehden s waṭas di tmurt n Leqbayel.Yessdukkel-iten daɣen i-wakken ad tteqqim tugna n At Jennad ur tɣell'ara, acku di tallit nni tella tmuḥqṛanit s waṭas, lεeṛc iweεan i-wayeḍ ad yeẓdem fellas, a s yečč ayla-s. Dɣa d amedya yella-d ṭṭṛad ger At Jennad Yeflissen, ɣas ulama ar deqqal fran. Γef waya yenna deg wawal-is Yusef U Qasi:

 

Aten-i usan-d Yeflissen

S Abizaṛ ad naɣen

Tiyita buzzal ifen-aɣ

Tazeddamt nugar-iten

Iḍelli nennuɣ nefra

Ass-a nuɣal d atmaten.

Azbu n At Jennad mgal Aṭeṛkwi

 

Amezruy meqqṛen deg At Jennad iḥdeṛ-s umedyaz Yusef U Qasi, wagi d ṭṭṛad gan At Jennad mgal Aṭeṛkwi di mayu 1758, di zman n ijmuyaε n liεeṛc n At Jennad am: Buwaεrur yellan afetni ameqqṛan deg At Jennad, wagi nnan-d iḥemmel-it aṭas Yusef U Qasi, d netta i-d aselway n ṭṭṛad, d netta i d ttayett-is, akal n-uzaɣaṛ d Bu Waεrur i-s-yegan lḥeṛma, netta d watmas At Jennad. Buwaεrur taddart-is n Welma Bwaman. Nnan-ed yeǧǧa-d awal ɣef uzaɣaṛ amek yewεeṛ umennuɣ-is, yenna-yas: "azaɣaṛ n bu teɣṛuṭ". Yella ɣer tama-s Lḥaǧ Muḥ U Smaεil n taddart n Tmizar, wagi daɣen d afetni ameqqṛan d aḥeddad n wawal.

Llan diɣen wiyaḍ usan-d ar deqqal di 1800, yecban Brahim n At Yebṛahim n Ubizaṛ, Ḥmed U Menṣuṛ, Mḥemmed n Ayt Qasi, Ḥedduc n Ayt Baḥa, wigi meṛṛa d ifetniyen n taggara yettnaɣen mgal Aṭeṛkwi d Wat Qasi. Anejmuε aneggaru gan di Tiɣilt Feṛḥat di 1825, ɣef akken i-d-yura José Lin Robin.

Ihi ula ar deqqal n tmettant n umedyaz imenɣi d Uṭeṛkwi mazal ur yekf'ara, yeḍṛa-d ṭṭṛad ameqqṛan ddaw n Izarazen d Ubizaṛ, mḥajin-as i-Wṭeṛkwi armi i-t- ssrewlen. Di tazwara igzem-asen tineqlin deg wzaɣaṛ, yesserɣ-asen igran n yirden, yewet-iten s lmoṛṭi, iḥeṛeǧ-iten ɣer wedrar, yezga-yasen-d s wadda, yeqḍeε-asen azaɣaṛ, yega igwrar deg imekwan-a, ddaw Izarazen, am: Iɣil Ideqqi, Lḥedd, Budrar, Nezla, Iɣil Uẓeqquṛ, artg... Ayen din d iseggasen d amdeqdeq yides, sebεa n iseggasen ur yekriz uzaɣaṛ, d amdedeq yal ass!

Sebba n talluft yesserfan Aṭeṛkwi d Wat Qasi d asɣaṛ n zzan i-yra a-d-yawi di Temguṭ ugin-as At Jennad ad iεeddi, d amedya yeǧǧa-d awal umedyaz Yusef, yenna-yas :"a Ben Aεli ḥeder iman-ik, nnan-i ssyadi yeḥṛem". Yerna yewwi sin isefra ɣef ṭṭṛad amezwaru, wayeḍ yegwra-d kan degs yinzi :"abrid ɣer Temguṭ ayes-it, asɣaṛ uεwij ctiq-it"

Yenna-yas daɣen:

 

Yettru Aεli Ubeεirec

Deg Iɣil hbant wurfan

Yettru yeqqaṛ-iyi Aεli

Anw'i-d aḥbib Umejqan

I-teḍmeε Qecba mm leɣṛuṛ

Tamguṭ mm yejga n zzan

 

Yerna yenna-yas :

 

Gedha Mḥemmed n Ayt Qasi

Lemmer di yerkib

Yewet yezwar di Lbay nnsen

Yerna ṛebεa deg wid

Yemutel-it Ḥmed Umenṣuṛ

Sebε'umi yegzem iqeṛṛa

Aεni wigi d At Jennad

Adrar ma yεuṣṣ'a t sseknun

Isefra nniḍen n Yusef d ttmussni-s meṛṛa:

 

Muḥend Bwezwaw aḥṛuṛ

Umliḥ n babas Aεmeṛ

Ur ak yessugut lehduṛ

Deg ul-is i-gferru cweṛ

Am tnina di ẓeṛẓuṛ

Akken i-yxeddem neɣ kteṛ

 

Kret a-ttewtem

A Yat Jennad ur naεṛif

Beggset ul anda tefrem

Ttif Muḥend Azwaw lɣiṛ

Kra yedder yettuṣeggem

Yif ma nekseb-it axiṛ

 

Tamedyazt d ttmussni nufa llan isefra nniḍen i-d-ufiɣ ɣuṛ yemɣaṛen deg tudrin n At Jennad, yiwen Lḥaǧ Aεli Ḥamuni n Tmeṛẓuga, wayeḍ d Lḥaǧ Muḥ U Lqayed n Tiɣilt, a-ten-id allseɣ, sarmeɣ ad ilin d isefra n umedyaz Yusef U Qasi s tidett-ines, neɣ ma yella cuban, ihi a-s-ttunnefken xeṛsum.

 

Qecba tebwi-d attafttar

Mi d-ẓuṛ tuddar

S lbaṭel n sidi Ṛebbi

Babas ur yettunnebdar

Yemmas d abaddar

Becci a-d-yeǧǧ Becci

Asmi lliɣ d llefḥel

Qesdeɣ llaṣel

Zeggreɣ i-lwadd s-ufella

Abrid-a ttidett newḥel

.......

Yak werǧin yega lfaεla

Asm'iyi rebḥen wussan

Tayerza s ddaw luḍa

Xeddmeɣ tiɣezza rennuɣ

Yal akufi yezzem leɣḍa

Tura mi njaḥ

Ṭamaεeɣ Gat Cenṭa

 

Wayeḍ :

Bismilah anebdu ankeṛeṛ

Akken i-s-iqeddeṛ

Ad immet deg Mataṛa

Irfed-ed ajgu meqqweṛ

Bezzaf d leqheṛ

Weḥdes ur s izmir ara

Ṛṛuḥ yeffeɣ aksum ṣemmeḍ

Deg wasif n Amṛawa

Lemḥiba n tura thujeṛ

Aḥbib a-k-inkeṛ

Mi-k-nɣan ad yettaḍṣa

Taggrayt

Ur ntettu tafenṭazit n At Jennad, daɣen s wazal-is, imi taggara n tmettant n umedyaz, ṛuḥen ɣer At Yanni wwin-ed Yusef U Qasi s takweṛḍa, meḍlent s tuffra deg iḍ ger idurna n tidekt di Tfuɣalt(tama n At Gweret, nnig taddart n Tmizar n sidi Menṣuṛ) gan taɛsast fellas ayen din n wussan, ammer a-d-asen At Yanni ad sent-id skeflen ula d nutni, a t rren ɣursen. Dagi i ɣ yessewhem umedyaz s wazal yessɛa, aṭas n yergazen i-yezran deg wmezruy, ssefran, uran, nnan, maca ur ɣursen azal am wagi n Yusef U Qasi di tmurt nnsen. D acu? Yettusema, amedyaz iban-aɣ-d mačči d awal kan, neɣ d ttajewwaqt yettṣefiṛen, acku yerna-yas i-tmedyazt-is igan imeqqranen yelhan. Lmizan-is ẓẓay am win n wuṛeɣ. Yusef U Qasi deg wakud-is, yella yenfeɛ tameti deg yettidir. A t nezrew d udem amrqqṛan tesselmed Ddunnit, ur yelli d aɣerbaz kan weḥdes, imi yal mˋara yeg kra n yigi iṣaɛben a t naf am akken d kra n temzizla i-yessezra yewwi-d arraz meqqwṛen yecban arraz n Nobel. Ihi aswir-is n tmussni yezga yettali. U Yusef U Qasi a naf yeṣṣaweḍ tamussni ɣer tilist-is. D amedyaz ur t ntettu, yessefk a t nessisen i-yelmeẓyen ugar, akken ad yali wass ɣef tmurt.

 

---

Tifin n kra isefra d ttemsal nniḍen ɣur yergazen yecban:

 

Lmulud n At Mεemmeṛ, deg wedlis-is "Isefra n Teqbaylit Iqbuṛen", Auguste Moulieras "Timucuha n Leqbayel", Bensdiṛa deg wedlis n Henri Genevoix "Tudrin n Leqbayel". José Lin Robin

Lḥaġ Muḥ Welqayed n Tiɣilt(ad yettwaṛḥem)

Lḥaġ Ali Ḥamuni n Tmeṛẓuga (ad yettwaṛḥem)

Maġid Izem Alma Bwaman

Benzidan Muḥend n Tmizar

Lhaġ Meẓyan Qasi n Tmizar(ad yettwaṛḥem)

 

 

 

 

 

Arut-ed tiktiwin nnwen ɣer tansa n email:Tamazight ass-a