Tiden yellan sɣur Aɛmeṛ Tafat

Ibruyen n tsekla 

"Tiden yellan" d awal yennumken i d-yeffɣen deg ul yessuddes-it wallaɣ, yessɣerbel-it akken iwata, yura-t-id Amar Tafat /08 di yunyu 2020.

Amdan ixeddmen

Amek ara kateɣ deg umdan ixeddmen, neɣ amdan iyi-yifen; neɣ amdan yeččuṛen d tiɣariwin(les qualités), nek yili ur mehleɣ, ur ssemhaleɣ; ur ttnadiɣ ad ẓiẓeɣ timsal ɣer udekwan?! Am wakken i s-yenna wergaz lεali: "ma ṛuḥeɣ nek yal cci iṛuḥ, anfet-aɣ seg tirwas, tirwas ttawint ɣer nger!". Nutni mazal ttkemmilen, medden xeddmen nutni gnen, regwin aḥḍun, zgan d irwayen d uεekwaz ger iḍaṛṛen, setten akerruc iskeṛ-iten, ur xeddmen ur ǧǧin win ar ixedmen, qqimen akken d ineggura ayen din d iseggasen, ulac d acu i d ibanen deg-sen ur sellen medden yissen, "yeqwel uqelmun s-iḍaṛṛen". D nger n ddunnit!

Win yessnen ur d-yenni...

Win izemmren ur d-yenni, tɣaḍ-it tmussni; neɣ yebɣa ad yuɣal d igenni; neɣ yettagwad tili; ur yettili ur yettuɣal d itri , yal itri ad t-yettwali mi d-yettali, netta ur yelli, ad yenddem ur tt-yufi!

Idis n talwit

Yerwel wul ɣer yidis n talwit, yettnadi tigzi d yedles, d wawal yennumken yessεan abaɣur di tṣeṭṭa-s, am tin n ttmeṛ d uzemmur, yelluẓ wallaɣ, tamussni yeččuṛen d taktiwin, ira akken ad yečč di llaẓ d ffad deg yella, ad yesseblaε tamussni ur tt-yettfeẓa, ad yaf tawant d lebɣi-s, as yefk lebɣi i ṛay-is.

Nnan wat zik: "awal ma wezzil yefra ma ɣezzif a d-yini kra

Yella melmi aḍṛis ma ɣezzif nettaεdaz ad t-nɣer, nḥemmel ad nɣer iḍṛisen imeẓyanen maca, yella melmi ula d iḍṛisen iɣezfanen ad naf deg-sen tamussni meqwren ma yella bab-is yewwi-d asentel yessεan anamek d wazal. Ladɣa taqsiṭ n tsekla, neɣ tin n umezruy, acku akka i d amdan yeɣran yettḥiri akken ad iɣer asalli ara as d-yernun tamussni, akken ula d netta ad yessεu tamussni meqwren di tudert-is. Acku tamussni win i tt-yessεan deg-s aṭas n ubaɣur, tamezwarut deg-s affud, ad yeqdec wallaɣ, ad yennerni weswir, ad fṛuṛxent tiktiwin.

Tilelli d iṭij 

Tilelli d iṭij n tefsut, icebḥen s ijeǧigen, walan-ten di yal tamurt, izegzawen d iwṛaɣen, tḥeqqeɣ wwiɣ-d ttbut, ǧǧant-id wid iṛuḥen, ilaq fell-as ad necfut ma nella d wid yedduklen, ayen ṛẓagen ur t-nettɣunfut, ma nessɛedda ussan qeṛḥen, war ilɣi ḥader ad nettut, ur d-yettas wayen ẓiden...

Tasertit

Tasertit telha am wakken daɣen ɣas ur aɣ-teεǧib ara ur nezmir ara ad nerwel fell-as imi nettat tetteddu d yimdanen s umata yal tasertit s tṛemmuεt-is, si tsertit ɣer tayeḍ armi imdanen s umata, yal wa d anida yeqqen […]

Neqqar di teqbaylit "akken yella wass ad t-yeks umeksa"

Yezmer ad yili wakud yewɛeṛ d aẓɣal, neɣ d asemmiḍ, am wakken yezmer ad yili d aḍu ajehli, am akken ad yili wakud yelha igerrez d aḥuskay. Amdan yewwi-d ad yili d anezbay zdat n temsal, di tudert-is acku, akken allaɣ-is ad yaɛden, akken diɣen tafekka-s. Tanumi qqaṛen "d tudert tis snat", akken yennum wemdan akken, timsal nessexdam yal ass, neɣ di tudert-nneɣ s immal i tent-nesseqdac s immal ttadfent idammen-nneɣ, d iẓuṛan-nneɣ nettuɣal am akken yissent i d-nlull, ttbanent-d seg-neɣ s waṭas!

Win ibɣan ad ittwabder

Llan imdanen i beqqun temɣer, ḥemmlen ad ten-id-yebder walebεeḍ s uzayez, nutni yili mazal ur wiḍen ɣer wemkan-nni. Amdan yebɣan ad ittwabder s tidett-is, yewwi-d fell-as a d-yawi amaynut ma yella d ayen ttagan akk lɣaci ur yewwi ur yerri! Akken qqaren imenza «nettεawad i yeɣsan asewwi», akken yenna daɣen Ait Meslayen deg wawal-is ɣef usentel-a "imezwura ččan aksum, ssummen adif, nekkni nettεawad i yeɣsan asewwi...". Ad fell-as yeεfu Ṛebbi.

Ussan qessiḥen

Aqlaɣ di tesemhuyt yettiwεiṛen deg ussan-is yemuẓɣlen, d tikli ad neǧ tizegzewt d tefsut alama d win yeddren, neɣ ɣer qabel! Yal wa yewwi-d ad iḥader iman-is ur as-yeqqar "d ayen tekfa". Yal tikelt amdan yewwi-d fell-as ad iceffu, asullef-ines iwata akken ad t-yemhel, deg wayen i t-yerzan netta s timad-is, neɣ netta d weqrib-is, yewwi-d imdanen ad ttemεawanen gar-asen di tegwnitt iserfen, ur iwata amdan ad iḍeṛṛef wayeḍ, neɣ ad yerwel fell-as.

Afellaḥ

Ccix Muḥend yenna:
Ṛǧiɣ i gerǧa ufellaḥ
Mi yessers tuzzar yeqqim
Yettṛaǧu a d-hubben leryaḥ
Ad yefru lḥebb ɣef alim
Nek ay ṛǧiɣ d axellaq
D netta i gzuzufen lɣim

Azal i idelsanen

Di tmura irebḥen imdanen -nsen ḥedqen s waṭas, ur yelli kra kan, ɣas ttidiren di teklassit maca, win ixeddmen ɣef tmetti neɣ ɣef yidles, ma yexdem aṭas s tmussni-s ttqaddaṛent, ttarran-as tajmilt, ttɛawanent, ṭillin fell-as ma yuɣ-it kra. Maca nekwni ɣur-neɣ tagi am akken d lexṣaṛa, d win-a yettṛehisen tamda, d acengu n tmussni iwumi ttarran azal, imi yessɛa tazmert, ttagwadent, d anemgal ma nwala yiwen iqeddec, as nettarra aɛekwaz ger iḍaṛṛen, akken ad t-nessefcel s wuguren u ma yella yezba, ad yexdem alama yeɛya ur as-neqqaṛ ula d tanmirt, ad nesfeḍ ayen yexdem (ma yella wamek), ma yuɣ-it kra ur nesseqsay fell-as, ur neṭili fell-as. At-an warraz d usebɣes n wuḥdiqen! Yewɛeṛ dɣa ad tesseqsiḍ ɣef yiwen?! Amussnaw di tmetti ayen din iṣeggem yesselmed, yefra ddɛawi, yekkes lḥif, yennuɣ ɣef izerfan, yenǧer iberdan ar deqqal, yal cci yejla am waman n wedfel!

A.Tafat

---

Arut-d tiktiwin nnwen ɣer tansa n email: Tamazight ass-a