Abrid n tmussni - asefru

Amecwaṛ uwεiṛ

Sɣuṛ, Amar Tafat

Aqli tedduɣ deg ubrid

Ɛebbaɣ tikti d usefru

Agwaḍ wissen ar melmi

Ernan-d yiḍan ɣef ɛeggu

Yal tiɣmeṛt zewiren-iyi-d

Akken fell-asen ad necfu

Bdiɣ taṣebḥit n wass

Uḥṛicen mazal ṭṭṣen

Arkasen d imaynuten

Seg tikli uɣalen qeṛṣen

Iḍaṛṛen teddun s waffug

Ul-iw mačči d win ittaysen

Ul-iw yettwali tṣaweṛ

N imussnawen yettwassnen

Zerrin-d sdat-i tikwal

Ttalsen-iyi-d tikta-nnsen

Affud yettnerni meqqeṛ

Nessarem tudert-nnsen

Ɣas ɛeyyu yewweḍ-d s ammas

Tabɣest teger-aɣ-d ifassen

Awi terreḍ kra yekka wass

Wissen tameddit amek

Newwi-d zzedwa meqqret

Yuɣal texsi ulamek

Ma nkemmel ar sdat yuɛeṛ

Ma neqqim ard anesbek

Af-as-d tifrat i talluft

Yal tussna attan zdat-k

Medden ttɛwanen yiwen

Yiwen ur izmir i waṭas

Aṭas n medden d tazmert

Ma tella tmussni di llsas

Yiwen weḥed-s iferru-tent

Imi d Uzmir yefka-yas

Ṣeggem awal-ik ar umussnaw

Ur s-qqaṛ kečč d afernas

Tamussni d tigzi qeṭṭun-d

Ma yella ur tessɛiḍ tikerkas