Teẓṛiṛuq.asefru.sɣur Lidya n Ǧeṛǧeṛ

Tenna-d "d asefru i d-kseɣ seg udlis iwumi fkiɣ azwel : imeɣban n ṣṣwab"

Teẓṛiṛuq

La d-qqaren ttuɣalen-d lmeytin

Yerna mebla aqerruy!

Sersen-t wid yukin

Wissen amek yesbaɛbuɛ ?

S yimi neɣ s tfednin ?

Ah deg yimeɣban yessedhuy

Acḥal iwumi i d-tettberriq

S uḍar yeffel i ukeddaṛ

Iɛud d netta iwumi d-tettirriq

Yessikid ɣur-s mẓennaṛ

Amrar i teɣzi n uɛenqiq

Ar deffir ma ur yerri aḍar

Am yiṭij n tmeddit

Akken i iga teẓṛiṛuq

Ǧğen-t kan d taseddarit

Aɛerbun yedda deg usenduq

Ifer n uyaẓiḍ yewwi-t

Win yeččan aḥaruq

Ṭṭfet tura deg yimijjel

Ula d win ma tufam-t

Yeẓṛuṛeq-d lweɛd yebṭel

Yewwi-t nadam n tmettant

Sersen-t kan ad yezdel

Wamma tibṛatin heggant

Teẓṛiṛuq yeɛya dayen

Meskin am uqejmuṛ

Ttɛawaden tiwwin i yibawen

Yal ibiw yeqquṛ

Ulac win i d-yettmektin

Afus s lemlaḥ yeččuṛ

Qqaren tirga mxalfa

Argut tenger truḥ

Iles ɣezzifen yeḥfa

Ɣas rret-t d acedluḥ

Ul iqebṛen yerfa

Ad as-inin yuḍen yemmux

Ɣer sdat zwir leɛqel

I wayen iwumi ur tezmireḍ xḍu-k

Llhi d yiman-ik ur sell

Yexḍa-k ubrid n ccuq

Win inudan ad issekfel

I as-izemren siwa teẓṛiṛuq

Uɣalet ɣer lebni n yinyen

Di tesga ɣzet lkanun

Teẓṛiṛuq yenser dayen

Llan wid ara t-id-yeḥyun

Yak ttnekkaren-d wid yemmuten

Fell-awen kan ara ten-run

Lidya n Ǧerğer, ass n 16.10.2014

D asefru i d-kseɣ seg udlis iwumi fkiɣ azwel : imeɣban n ṣṣwab