Nḥemmel tuḥsifin

Tura iwata ad nemyiεqal d atmaten, ad nettu lhem aɣ-yettu, as-nefk nuba i tmussni d tigzi, ad nessirem ad d-yecṛeq yiṭij fell-aɣ

Di tillay tiqbuṛin asmi ḥekmen-t teqbilin d tudrin, ad naf tiqbilin gar-asent, neɣ tudrin ttemguclunt, ɣef tlisa d wawal n tmerna, d ummiẓ ɣef wulac. Ulac taddart neɣ taqbilt iεedlen nettat d tayeḍ. Tin n wadda, tin ufella, yal wa yekkat ɣer tama-s! Yili annect-nni, yuɣal akk d aṭan, imzukrar-d netta d leqṛun, yuɣal d anemgal, d ccḥani. Nessarem tura tadukli ar aɣ-yezdin am yiwen n ufus, acku ar ass-a llan wid i d-ismektayen tuḥsifin ula s yigan, mačči kan s tira d wawal, deg umkan anda ara nessiked ar yizri s tiṭ nusqeṛdec, ur yelli s tiṭ n tumert ɣer wayen ur nenumek. Mazal ar ass-a nemsekṛah gar-aneɣ seg teɣmert ɣer tayeḍ, ɣef wulac. Zik medden teddun s tuffra, acku ma yeẓṛa-k uxṣim-ik tettedduḍ ɣer kra n umkan, neɣ ar kra n ttiεad, ad ak-d-izewwer, ak-d-igzem abrid, ur k-ittaǧǧa ad tawḍeḍ! Akka i ttidiren wat zik, maca tura iwata ad nemyiεqal d atmaten, "ad nettu lhem aɣ-yettu", as-nefk nuba i tmussni d tigzi, ad nessirem ad d-yecṛeq yiṭij fell-aɣ, ad yekkes usigna d lḥif ittsetifen yal tallit. Akka ur nettili ddaw medden. 

A.Tafat