Tenna-yas tutlayt n tmaziɣt

Widen d tiden iḥesben iman-nnsen ɣɣran

Ttɣiḍin-iyi widen d tiden iḥesben iman-nnsen ɣɣran, nutni ar tura ur ssnen ad arun s tutlayt-nsen, ttεeddin deffir-nsen wid d tid yessnen, nutni ur ten-iqṛiḥ umeẓẓuɣ. Rnan zzux s ufella! Akken i das-yenna umsewweq-nni n zik : "ma εeddan, ma cqan-k, ma qeḍεen-k-id anef-asen". A d-nuɣal alama d awal-nni n "uɣenǧa".

YENNA-YAS YIWEN AM NEK

Amahil-iw d aṣkay s wawal n tmaziɣt, am umeṣkaw yettaṣkin ixxamen icebḥen, s  waṭas n iɣunab: awal n tsekla(tasrit), asefru, tinfaliyin, inzan, tinebdurin...

Isufar-a i as-d-irennun taḥuski i yal amagrad.

 Efres, enqec, leqqem, zzdem-d, qeddeṛ

Yella yiwen n ufellaḥ zik di taddart-nneɣ, cfiɣ-as-id, yal taṣebḥit, ad twaliḍ: taqabact ad tt-yerr ger tuyat, amger deg ufus, llemqes, ad inddeh ɣar wayla-s. Ass kammel, fres, enqec, leqqem, zzdem-d, qeddeṛ. Aya deg-s d abaɣur, deg-s d addal, yufa iman-is d ayen kan. Ittwassen di taddart d amdan ixeddmen cɣel-is, inǧa i unebbec d usmenteg, d txeftin, d tqilεin. Ihi ula d nekni akken, d ifellaḥen deg unnar n tmaziɣt.

Ad tweḥdeḍ taqedṛit di tzizwa daxel n teɣrast

Yal wa amek i das-teḍṛa di ddunnit-agi. Ad tweḥdeḍ taqedṛit di tzizwa daxel n teɣrast, agellid ad yessefṛuṛex aglaf, aglaf n tzizwa ad yezzi ɣef ugellid ad t-nɣent, tizizwa win qqsent ad mmtent. Akken tenɣiḍ ara temteḍ.

"Taɣrast mi teččuṛ tessuffuɣ". Ticki i d-yeffeɣ uglaf qqaren-as "ers ay agellid ad rsent".

Amar Tafat