Igerdan zik-nni

Ma ad d-nawi awal ɣef ugrud n wass-a, d aqcic neɣ d taqcict, iwata ad nḍill ɣer umezruy acu i d-yenna fell-as, di tillay iwumi i d-necfa, i d-cfan imeqqranen.

---

Tallit, send tagrawla n 54, imiren i nezmer a d-newṣef amek ttidiren warrac d tullas di tmetti taqbaylit, d tmettiyin-nniḍen n tmura yezurgen. Amkan n ugrud di tmurt n leqbayel zik, yezga-d imunddel s waṭas, yulwa s waṭas. Imi tuget n warrac d tullas, tamezwarut ur ssinen ara d acu i d aɣerbaz. Di tmetti taqbaylit zik mačči am tura, yal taddart s uɣerbaz-is, llan ttawilat n usiweḍ, d tawilat-nniḍen, maca zik yal 10 tudrin ssεant aɣerbaz, d widen kan iqeṛben i izemmren ad ɣɣren deg-s, maca wiyaḍ d awezɣi. Taqcict dɣa ulac fell-as awal n tɣuri, anagar ayen ara telmed ar yemmas d imarrawen-is. Ma yemmas d babas ssεan idles n teqbaylit, as t-ssisnen, am tmucuha, isefra, tinfaliyin d yinzan, d usenfali s teqbaylit.

Aqcic

Aqcic ad ilmed tamussni ar imawlan-is s wawal n timawit, imru ur t-yettissin ara,  anagar arraw n imeṛkantiyen i d-yeffɣen ssnen ad arun. Wamma aqcic, a d-ikker meẓzi, ad itturar uraren n wakud-nni, melmi yewwed 10 iseggasen "d ameksa", ad isuffuɣ lmal, ad ikkes, mi yessaweḍ 18 n iseggasen ad ibdu ad ittalmad takerza s yizgaren. Deg wakud-nni, yettlusu, tacacit, aqendduṛ, arkasen. Lqella n tezdeg, ulac ṣabun, ulac aman. I syen akkin mi yebda ikerrez, d afellaḥ, ad t-id sawmen imawlan-is ɣer tisulya, ad iqbel cuṛuṭ n teqbaylit. 

Taqcict

Taqcict zik di tmetti taqbaylit taqbuṛt, amkan-is ixuṣ, am wakken ur ixuṣ, acku taqcict ar imawlan-is aεzizet nezzeh, ḥemmlen-tt seg-mi ara d-tlall, maca tametti d wansayen-is, sneɣsen-asen deg wazal gar-as d uqcic. Taqcict mi ara ternu ur ttumuren ara fell-as am uqcic, ur sseɣraten-t tlawin, ur ssuffuɣen felll-as lbaṛud, ur ttagant fell-as urar tlawin. S tsusmi i yettεedday umeḍṛu-ines, ttagan-as cwiṭ n imensi n telt-yam(ass wis kṛaḍ n tlallit), d anemgal aqcic, zellun fell-as ikerri ass wis sa n tlallit-is(sbaεyam), seččayen fell-as tawacult d iḍullan.

Ihi taqcict tettenkar-d kan s wudem aḥerfi, am wakken i d-tlull i tettkemmil, tettili deg uxxam, ur tesεi tilleli am uqcic iwakken ad teffeɣ akken is yehwa, daxel n wexxam, neɣ deg ufrag, ad turar uraren tturarent tullas timecṭuḥin, (tixxamin, tiεelǧtin, alqafen...). Ma tesseɣzef ad teffeɣ s aqwiṛ, neɣ ar tala, taqcict teṭṭafaṛ tameṭṭut, ansi tεedda tmeṭṭut,  ad tεeddi teqcit, ad telmed akka alama temmed, ad teṣbeḥ tessen amek ara teddu am tlawin n taddart.

Taqcict di temẓi-ines zemmren ad tt-id-sawmen ar zwaǧ, tella teqcict ttḥeṛṛin assen mi ara d-tlall, tella tin iteddun d tislit ɣef sdis n iseggasen. Tagi dɣa tessewham kra, imi mi ara teddu d tislit tettawi yid-s taεelǧet-nni swayes tetturar, mazal ad ternu ad turar tixxamin deg uxxam-is, am uxxam-nnsen, as rnun diɣen tamussni d ttṛebga at uxxam-is. Assaɣen ur d-ttilin gar-as nettat d urgaz-is, ad teggan ar imɣaren-is, alama temmed tewweḍ d tillemẓit, ar as tt-ffken. Seg imir ara bdun ad aṣkin axxam-nnsen di sin.

Amar Tafat