Aktayen n taddart

Ḥemmlaɣ ad d-senfaliɣ s tira ula ɣef taddart, amek nettidir tura d wamek ttidiren imezwura, sarmeɣ yella wacu ara d-tleqḍem di tira-w.

Talluft n trisiti

Deg iseggasen n 90 d akessar nella nettidir di tillas di temnaḍt-nneɣ n Izarazen, imir ulac trisiti, nella neɣɣar nettaru ɣer tcemmuεt, wiyaḍ ɣer llamba n ugaz, yella ukanki, yuɣal terna-d teftilt n tbunbunt n ugaz, tin-a tgerrez telha tafat-is am trisiti. Nsell i ṛadyu s iblaḍen(pile), taftilt n ufus(l'ampoule) diɣen s iblaḍen. D tamnirt, d lmeḥna, d laxeṛt! Armi d aseggas n 1994 i aɣ-ceεlen trisiti, maca llant tudrin ssεant send-nneɣ... Cfiɣ ass-nni deg i aɣ-ssaɣen trisiti nega tameɣra tameqqrant deg Izarazen, nek seg tama-w necdeɣ-d kra n iεeggalen n umaṭṭaf wis sin: Saεid Freha, Maǧid Ben Belqasem, Arezki Azuz, gan-aɣ-d yiwen n umahil igerzen, tnemmer-iten taddart-nneɣ s waṭas. Arrac n Izarazen qedcen s tumert d rezgg, yal wa d tirni i d-yefka ass-nni deg wahil n tmeɣra. Yella wawal, tella tmedyezt, akked d ccna di taggara. D asmekti kan s tewzel ɣef waktay amezwaru deg Izarazen

Yelha ufras deg unebdu

Yal taṣebḥit mi ara d-ffɣeɣ deg uxxam, tedduɣ-d azal n 900 mt ɣef uḍaṛ, acku ttiḥmileɣ ad dduɣ ɣef uḍaṛ, imi ttafeɣ deg-s ddwa. Ihi walaɣ ass-a tama n ubrid, deg waylaten, tuga bdan ara tt-meggren medden. Yenna-k yiwen : "aqlaɣ deg iwraɣen". Nniɣ-as : "yelha ufras, acku aseggas-a yeǧhedd wummad, tecentef akk tmurt, imi wten waman s waṭas di nissan, ma ur nefris, aɣ-tefk axeṣṣaṛ tmes". Yenna-k : "qrib diɣen d tamegra n yirden, kra n ledwaṛ akka". Nniɣ-as : "aserwet alama teḥḍem?". Yenna-k : " amek ih, ur tezmir ara ad terwet teṛḍeb". hhhh". Nniɣ-as diɣ : "nek di ṣmayem i lluleɣ, m'akken ṣeṛεen yibẓaẓ!". Yenna-k : "ṣmayem alama 24 juillet iṛumyen". Nniɣ-as : "ih akka, lluleɣ ass n 28 di yulyu".

Amahil yessεa abaɣur

Yella yiwen n ufellaḥ zik di taddart-nneɣ, cfiɣ-as-id, yal taṣebḥit, ad twaliḍ: taqabact ad tt-yerr gar tuyat, amger deg ufus, llemqes, ad inddeh ɣar wayla-s. Ass kammel, fres, nqec, leqqem, zzdem-d, qeddeṛ. Aya deg-s d abaɣur, deg-s d addal, yufa iman-is d ayen kan. Ittwassen di taddart d amdan ixeddmen cɣel-is, inǧa i unebbec d usmenteg, d txeftin, d tqilεin. Ihi ula d nekni akken, d ifellaḥen deg unnar n tmaziɣt.