Yiwwas deg ussan

IKKAT "TAḌEBBALT" FELL-I

Yiwwas deg ussan, deg wasmi meẓẓiyeɣ, ad ssεuɣ azal n 30 n iseggasen, neqqim akk akka ar yiwen n umɣar, d tasqamut, isenfali-aɣ-d s teqbaylit. Netta iεǧeb-as wakud imi i as-nsell, netta yebda-tent-id ta deffir tayeḍ, nekni nefka-yas tameẓẓuɣt imi imeslayen-is d tamemt mi tettceṛcuṛ. Ihi yewweḍ-d ar yiwen n wawal : yenna-ak : « leflani, yir zariεa, yekkat taḍebbalt fell-i; anda yedda ad yewwet taḍebbalt fell-i ; irna anagar rezgg i as-xedmeɣ...» 

Inṭeq-d yiwen n urgaz yenna-as

— D tismin i yusem seg-k. Win-a yettwassen d acu-t. Win deg wadeg yenḥa ad yili Wuzmir yid-s.

Neṭqeɣ-d nek nniɣ-as akka :

— Suref-iyi a dda leflani, ad ak-gezmeɣ awal s tamemt

Yenna-k :

— Ih ṛuḥ ini-d acu tebɣiḍ

Nniɣ-as :

— Ahaa. Awal-ayi n "tḍebbalt" kan ur gziɣ ara.

Yenna-k s unecṛeḥ:

— Hhhhhhh . Ahya ay amedyaz mačči dagi i telliḍ, neɣ tsewqeḍ

Nniɣ-as 

— Bɣiɣ ad t-gzuɣ nezzeh a mass, i wakken ad t-sqedceɣ. Sεiɣ azref neɣ ala?

Yenn-ak

— Ih tura ad ak-segziɣ. Yekkat "taḍebbalt" fell-i yaεni : ittmeslay fell-i yir awal, iseqcaṛ deg uεrur-iw! Dderbeg derbeg deg uεrur-iw!

Nniɣ-as

— Tura gziɣ-t. Tanemmirt-ik, aqli lemdeɣ-d ayen ḥwaǧeɣ ɣur-k .

Amar Tafat