Asfuggel n yennayer deg iseggasen yezrin 2024 akked 2025

Asmekti

ASFUGGEL N YENNAYER DI TIKOBAINE 

Amar Tafat, 12 janvier 2025 

 Ass-a n umenzu n Yennayer ɣef 10t lliɣ di temdint n Tiqubεin, necden-iyi-d Tiddukla Tadalsant Tamusni n Tikobaine, i wakken ad d-siwleɣ asarag ɣef "Yennayer d wazal-is deg umezruy". Ihi ɣef tsaεett-a sawleɣ-d asarag-iw armi qrib d 12t, llan medden di tzeqqa n Temkeṛḍit, imeẓyanen, imeqqranen, argaz tameṭṭut. Yuɣal ilḥeq-d Mass Madjid Oumnia d amaru n Tmaziɣt, yefka-d ula d netta awal-is. Tella din dɣa Ṛadyu Tizi-Wezzu, anda iyi-d-iseqsa Mass Chekroune, meslayeɣ-as-d ɣef usarag-iw, akked wazal yesεa Yennayer. Tanemmirt i Mass Samir Heddad ɣef uncad akked Massa Nadia Tikobaini, ɣef usuddes-nsen igerzen ama d timzikent, ama d asarag. Affud igerzen di leqdic-nsen.

Asarag i d-yefka Amar Tafat

---

Asfuggel n Yennayer di taddart Almabouamane 

Amar Tafat, 24 janvier 2025 

Taddart n Alma Bouamane i d-izgan di tɣiwant n Timizar At Jennad, ass-a tesfuggel Yennayer s yiwen wahil anesbaɣur yeččuṛen d idles d tgemmi taqbuṛt : Isaragen, tamedyezt, ccna, amezgun, tiḥirfatin tiqbuṛin(afexxaṛ, aẓṛef, d waṭas n tɣawsiwin(azal n 40 n tḥuna), am wakken d tisewiqt. Seg tama-w ad snemmreɣ Izem Madjid d taddart n Ulmabwaman iyi-d-inecden iwakken ad d-siwleɣ asarag, giɣ-d asarag-iw ɣef 11t armi d 12t "Yennayer deg umezruy". Am wakken ufiɣ din ṛadio Tizi-Ouzou, ad snemmreɣ Mass Arezki Chekroune, iseqsa-iyi-d ɣef usarag-iw, aṭas i d-meslayeɣ ɣur-s. Affud igerzen i taddart Almabouamane ɣef leqdic-nsen igerzen icebḥen.

Asarag i d-yefka Amar Tafat

---

Asfuggel n Yennayer di taddart Abizaṛ 

 Amar Tafat, 16 janvier 2024 

Ass n umenzu n Yennayer taṣebḥit ɣef 10t 30 giɣ asarag ɣef «Yennayer d umezruy n temnaḍṭ n Ubizar», di temkeṛḍit n Ubizar. Yella yid-i umaru n tmaziɣt Mass Abdella Aεeṛkub. Massa Karima Meḥala d tanemhalt iyi-d-inecden s teɣzi n tudert-is, d waffud imi tesuddes akken iwata axxam n Yidles n Ubizar s imuhal inefεen idles d tagmi n tmaziɣt.

Asarag i d-yefka Amar Tafat

---

Asfuggel n Yennayer di taddart n at Gweret 

Amar Tafat, 12 janvier 2024 

Ass-agi mwawleɣ, anda iyi-necden di tudrin n tɣiwant-nneɣ rziɣ. Taṣebḥit ddiɣ ɣer taddart n Ubiẓar, giɣ-d asarag ɣef Yennayer di temkeṛḍit n din-a, yella yid-i Mass Aɛerqub d amaru, iɛeggalen n temkeṛḍit. Tanemhalt n temkeṛḍit Massa Karima Miḥala tbedd nezzeh ɣer leqdic n yidles, yid-s Tidukla Tadelsant Tussna, ula d nutni ur xuṣṣen ara, gan-aɣ udem, nessarem-asen affud iǧehden. Syen tewweḍ-d 12t nerra ɣer Uɣerbaz Anuc nnig n Temkeṛḍit kan i yella, din-a tella llwaɛda n Yennayer, xedmen leqdic d ayen kan, nečča-d ciṭṭuḥ n imekli, neffeɣ-d srid ɣer taddart n At Garet, taddart n Yusef U Qasi, din-a sɛiɣ(diɣen) asarag ad t-xedmeɣ ɣef usentel "Amezruy n Wat Jennad akked Yusef Uqasi", ufiɣ llɣaci ad ibarek Wuzmir, giɣ-d asarag-iw slan-as. Sarmeɣ-asen talwit s umata.

Asarag i d-yefka Amar Tafat

---

Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.