Saɛid Udali ameɣnas amaru bu tebɣest

Tira

Saɛid Udali amaru ameɣnas bu tebɣest

Saɛid Udali d amaru s tutlayt n tmaziɣt, seg zik mačči armi d ass-a, yura deg tesɣunt Izen Amaziɣ i d-yetteffɣen deg iseggasen n 90, akken i d-yenna yura aṭas n yidlisen.

---

Taswiɛt-a yessuffeɣ-d kan yiwen ɣef unaẓuṛ Aḥmed Cabi. Idlisen nniḍen mazal ur d-ffiɣen ara, acku ur tessefk ara tegnit, nessaram akka ɣer zdat ad yaf ttawil, akka akk i teḍra d wid yettarun s tutlayt n tmaziɣt, yiwen wugur akk ay sɛan, tira aṭas i yettarun, assuffeɣ, kra kan. Ladɣa yenna deg awal-is: «Ttaruɣ tizrawin, tamedyazt ɣef tsekla abaɛda timawit akk d wayen d-icudden ɣer yidles-nneɣ s umata».
Deg udlis yura ɣef unaẓuṛ Aḥmed Cabi i d-yessuffeɣ ɣer teẓṛigin Tamagit, ufiɣ isers-d kra n yidlisen yura mazal ur d-ffiɣen, (am Tiqdimin-nneɣ, Tigemmi, Tissirt iẓaden ṛeẓq, akked Lkuca n lqeṛmud, Ammud n yifyar) acku yesɛa ugur ula d netta di temsalt agi n isuffeɣ n wedlis ladɣa yenna-d:«idlisen d-serseɣ di tjellabt-a, werɛad i d-ffɣen. Ugur xuṣṣen ttawilat, simi ur tgerrez ara tezmert n wussan-iw».

Saɛid Udali iḥemmel tutlayt-is d yidles-is d ameɣnas n tmaziɣt geddac aya. Mi yas-nniɣ d acu twalaḍ deg imeɣriyen n tutlayt n tmaziɣt? Dacu ara sen-tiniḍ? Netta isḥassef cwiṭ ɣef teswiɛt n wass-a deg tettidir tutlayt n tmaziɣt gar warraw-is, lemmer d lebɣi-k ay ul, iwata ad refden adlis-is s igenni, ihi yenna-d ɣef waya: «ass-agi a gma Ɛmeṛ, ṭṭuqten wid yettarun ɣef yidles d tutlayt n tmaziɣt, maca imeɣriyen ur ṭṭuqten ara... Ay agi, d asḥissef ameqran, ad sen-iniɣ: "issefk ad tt-lemdem ayen d-itteffɣen ɣef yidles d tutlayt-nwen, acku d kunwi kan ara irefden tutlayt- nwen, akken daɣen, ad ttgen affud i wid irefden ticcert- nsen deg udem-ines" . 
Mi da t-ttreɣ diɣen ɣef umgarred yellan gar iseggasen yezrin d wid i d-yernan ɣef tutlayt n tmaziɣt, seg iseggasen n 90 ɣer tallit n wass-a, yenna-d: «acu ara k-iniɣ : iseggasen-nni n 90, ddeqs n wid yesɛan leḥṛaṛa, qqaren-tt, ma d ttawilat i wid yettarun, axiṛ ass-a».
Awal-is yeṛzen, iṣeggem mačči d kra, iberru-d i tiktiwin, imi d amussnaw. Nessarem-as afud iǧehden i Saɛid Udali, s immal ad d-isuffuɣ deg yidlisen akka ɣer zdat.

Amar Tafat

Tirawt n tmaziɣt