Yusef Meraḥi amyaru, yefkan azal i ticcert

Ugar n yisallen _ plus d' infos

Yusef Meraḥi amyaru yefkan azal i ticcert.

Yusef Meraḥi, d amedyaz d amyaru, yesɛedda tudert-is di tmussni d tussna, mi yemmut yeǧǧa-d agerruj deffir-s, am netta am imyura yezrin. d yiwen wergaz aḥerfi, yettaga azal i win ixedmen ɣef tutlayt n Tmaziɣt, abaɛda win yettarun.

Zik deg iseggasen 2000 nella nettemyaggar di temdin n Tizi Wezzu, nettwali isaragen, nettmeslay yid-s, nelmed-d ɣur-s iwellihen. Ufiɣ-t deg-s yiwen wergaz aḥerfi, yerna yeqwir ɛlayen, d mmis n uɣerbaz n tnebdelt(administration), maca ur nessemɣur deg iman-is, ma yessen taɣawsa ad k-tt-id-yini s tumert, ur yesɛi ara aɣullu d uɣunzu. Am wakken ttaseɣ ɣur-s tikwal ɣer usqamu unnig n Timuzɣa di timdint n Zzayer, asmi yella d amaray amatu n usqamu, akked dda Muḥend U Yidir At Ɛemṛan yellan d aselway n usqamu, deg sin yid-sen, nnan-d "mi teḥwaǧeḍ taɣawsa as-d, am wakken d axxam-ik".Yusef yenn-yi-d yiwwas " a Ɛmeṛ awwi-yi-id meṛṛa ayen turiḍ, ad nwali ahat yiwwas ak-d-nessuffeɣ kra deg yidlisen-ik". Daymi i yawen-nniɣ yettaga azal i win yettarun, yessikkid amdan s wayen ixeddem, mačči s wayen yesɛa di ǧib-is. D amedyaz d isem-is i d awal-is, mačči d awal kan. Ifukk ussan-is ass n 28 di meɣres 2025, iziɣer-is di talwit.

Yura ayen din yidlisen, ɣas akken s tefṛnsist i ten-yura, maca iman-nsen d taneṣlit d tamazɣt, yessuffeɣ-d adlis amenzu d ammud n isefra di 1980 isema-yas "De l’absurde au quotidien", neɣ "Ahdum n yal ass", yerna-d idlisen nniḍen wa deffir wayeḍ... Yerna-d aneggaru d tajmilt i wmeɣnas amedyaz yettwanɣan Tahaṛ ¨Ǧaɛuṭ, ad ten-iṛḥem Ṛebbi xedmen nezzeh, yeṛḥem akk imyura yakk yemmuten.

• Sɣur : Amar Tafat

---

Amedyaz yessikkid amdan s wayen ixeddem, mačči s wayen yesɛa di ǧib-is. D amedyaz, d isem-is i d awal-is, mačči d awal kan.— Amar Tafat

---

---

_{Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.}