Akemmel n wedlis «Amsawal »

---

-- Ixfawen imezwura -- Ixefawen n umsawal,1,2,3,4,5

Ixef 6

Yenna-yas Win-a: Ini-d ayen ilhan yibbwas Anef-aɣ si tmekras S umesxellal ur d-kkat Ma d seksu teɣz'useggas Ğğ-it din anef-as Ula d abujil yeṛwa-t Ɛyiɣ gurar n tiddas D tirza s imeɣṛas Tigi ɣur-i d siɛṛat Yerra-yas Wuḥdiq: Ur ttraɣ taḍṣa tawṛaɣt Yal aẓi kecmeɣ-t Taneẓṛuft illen idurar Ak-iniɣ rezgg walaɣ-t Win yesɛan tallaɣt Ur ittceggiḥ di lesrar Cacneq yuɣal-d cummeɣ-t S igenni refdeɣt Ḥeznen ula d igudar

— 39 —

---

Yenna-yas Win-a: Eniɣ-as a neg ardag Ur ittban d ayzag Bu tmussni yawi-tt-id Ur tt-ili d amentag Wala d amenṭag Ney ax-tt-in, er-itt-id Tusiḍ-iyi-d d amaccag Teffɣeḍ ameggay Yerna taḍṣa tusa-k-id Yerra-yas Wuḥdiq: Tusiḍ-iyi-d s wurfan Qubleɣ-k-in d aman Deg illel a tettɛumuḍ Ayen i d-tettreḍ iban Erriɣ-k-in s ccan Wissen ahat m'a tt-cfuḍ Aɣṛum nettekkes-as iran Ittwačč d aẓidan Sebleɛ kan ma tteṛwuḍ

— 40 —

---

Yenna-yas Win-a: Lemdeɣ taɛṛabt taṛumit Erniɣ tagnizit Ur ttuɣaleɣ ar deffir Tagi-inek n msakit Ur tella di Ddunit Ayaziḍ ur yettferfir Walaɣ-k-in tecbiḍ tisirt Neɣ tala n tiqit D amaɛduṛ mi yettkerkir Yerra-yas Wuḥdiq: Tutlayt-iw tebweḍ amaḍal Ssnen-tt at yimmal D wagad ittran ad ẓṛen I tgerrzeḍ ay axelxal Eddu ɣef wakal Ur d ṛeṭṭel afriwen Ɣas tkeṛheḍ amellal Ur d-qqar d adal A k-ḥesbeɣ seg uḥdiqen

— 41 —

---

Yenna-yas Win-a: D ayen illan i k-d-sawleɣ Abrid ur k-ffɣeɣ Ur zriɣ ma tettwaliḍ Ayen akw i d-nniḍ fehmeɣ Gweqbur ur ḍemɛeɣ Ac'akka i d-suliḍ ? Amek triḍ ad ak-amneɣ Neɣ ad ak-sleɣ Damussnaw aqla-k teɣliḍ Yerra-yas Wuḥdiq: Akk'ik-icuba walleɣ-ik Ṛqiqet tedmi-k Armi k-yaɛṛeq ugellid Ɣas mu lldi-d iẓri-k Am assa, am zik Tafat yak tunag tezzi-d D ifṛanken i lweṛt-ik Ur illi d iseɣ-ik A mimi mu wali-d!!

— 42 —

---

Yenna-yas Win-a: Iḥqa d kečč I d Kussayla Neɣ ahat d Yuba D asefrak n yimaziɣen Rnu ssker-d Dihya Eget-d tagrawla Aṭas ara kwen-yallen Ma yella s cḍeḥ d ccna Ur cukkeɣ ara A tt-qeḍɛem wid ikwen-ifen Yerra-yas Wuḥdiq: Ahya ccix i k-islemden D bu walddayen Daymi tlehḥuḍ ɣef yidis Ay imdanen i di-ttlalen Ttimɣuṛen zelgen Yal wa iɛṛeq-as yisem-is Sefhem a wi isefhamen Şeggem deg uzligen Ur k-zmireɣ ay afḍis!

— 43 —

---

Yenna-yas Win-a: Asmi d-kreɣ meẓẓiyeɣ Am ayetma qqareɣ Yiwen webrid i nebbwi Xedmen medden nek xeddmeɣ Tura ur nddemmeɣ Ur ttawdeɣ s igenni Hemdeɣ Ṛebbi mi gerzeɣ Akk'ara kemmleɣ Fkiy-ak tafat gefri Yerra-yas Wuḥdiq: D ayɣul i gnekṛen laşel-is Iğğa di nnif-is Armi s-rnan tabarda Win tebɛen aɛebbuḍ-is Ad izenz ixef-is Mačč'a d-yakwi di tnafa D tikerkas i d aɛwin-is Aḍu ay isem-is Ur iban anda yella

— 44 —

---

Yenna-yas Win-a: Tenniḍ ur sɛiɣ tabburt Tuqmeḍ-i tacrurt I wakken ad beddleɣ tikli Tifirest akw d tzemmurt Tayaziṭ tasekkurt Akka i tt-yebna Ṛebbi Lemmer di tettraḍ tamurt A tt-sɛuḍ tugdut Teẓṛiḍ amdan d ilelli Yerra-yas Wuḥdiq: Lemmer d tikti n tegmat A d-ddmeḍ tadwat D agemmay ar da taruḍ Tamaziɣt uḥdiq yeɣra-tt Yegza d tayemmat Amek akka ar tettɣuṛṛuḍ Tutlayt ur tesɛa tacmat Am kečč ɣas yeğğa-tt Mazal lhiba-s ad-suḍ...

— 45 —

_{Tekfa teqsit ass n sebt 27 di meyres 2004}

---

Ixef 7

Yenna-as Win-a: Issefk-aɣ a nemsefham Inna-yas Azam ! A nettruḥ a nettuɣal..., Seg Maziɣ ar sam Ar assa d asemmam Iggum'ad ifak cwal Ufiɣ Imal abugam Meskin d asusam Ira a d-yini awal Yerra-yas Wuḥdiq: Ma d Descartes neɣ d Pascal Yal wa i gektal Was teɣzent wayeḍ d tigzi Seg tidet, ɣer temcukkal Teẓṛiḍ d aččaqal A win ur njeṛṛeb ini Tḍemɛeḍ tikli iḥuqqal Ma d kečč d aqwellal Tsehleḍ maḍi i tṛuẓi

— 46 —

---

Yenna-yas Win-a: Ay uccen gar tɣeṭṭen Teẓṛiḍ ik-yuɣen Ɣas ur ttuɣal ɣer din D tazermemut i gsehlen I gettagwaden Tɣaḍeḍ-iyi mi k-ttɛeddin Ay ẓṛiɣ kra n yemdanen Ḥettben iman-nsen Nutn'ur bwiḍen d win Yerra-yas Wuḥdiq: Tura teqwleḍ d imensi Telhiḍ a ɣwelmi Ur teẓṛiḍ kečč temmuteḍ Teqwleḍ d argaz ur nelli Lemmer axiṛ d askuti Tamurt-a a tt-tqaṛɛeḍ I sulin ɣer igenni Şubben-d ir kwelli Tamara i ten-neṛkeḍ

— 47 —

---

Yenna-yas Win-a: Keččini yal ass kif-kif Cubaɣ-k ɣer wasif Seg jambeṛ armi d magu Ma tuɣaleḍ am lexṛif Eddun kan f rrif Ur ttargu isisnu Ḥader iman-ik f uqeṛṛif A k-issum adif Abɛad fell-ak m'ad ittru Yerra-yas Wuḥdiq: A tt-ḥzen tṛebbanit Tessneḍ taṛumit A wagi yettaɛṛaḍen Ur heddṛeɣ tačewčawit Tedduɣ s talwit Wid ixaqen ad azzlen Tutlayt-iw d tameṛkantit Tezyen d tacacit Ungifen akw ttwaqeṛḥen

— 48 —

---

Yenna-yas Win-a: Imeslayen-ik d langgri Ezreɛ kann ar igenni Ar wakal a d-uɣalen Win illan d amaṛkanti Ur ittelli imi Ittinig s ijenṭaḍen Susem meqqar a xali Lhala-k tezwi D ddaɛwessu i k-ixuşşen Yerra-yas Wuḥdiq: A bu wacciwen yeṛẓen Ernu sbedd-iten Ur bɣlɣ a k-ten-qelɛeɣ Ewet kan s ikwerrayen Fukken-ak idɣaɣen Tɣaḍeḍ-iyi a k-kemmleɣ Sell-iyi-d a gma ɛzizen Elli-d imeẓẓuɣen Taqbaylit a k-tt-seččeɣ

— 49 —

---

Ynna-yas Win-a: Ḥu! ḥu! Akka i d asefru Seɣzef-it am saru Ernu eg-as afriwen Ay aɛefrit bu qeṛṛu Teqleḍ d asafu D tarewla i d-yeqqimen Ay arrac ay ahṛuḥu Ɣileɣ kan d seksu Ziɣen maḍi s icriḥen Yerra-yas Wuḥdiq: A wagi yettqabaḥen Ma teḍṣiḍ ḥzen Ar udernu n ukkabbaṛ Tafukt agi d-iḍallen Ttcedhin-tt medden Ttɛassan-tt m'ara d-tenqeṛ Wid ittwaṛniḍen qelben Ɣur-i d iriten Ɛedleɣ-ten nutni d lɛaṛ

— 50 —

---

Yenna-yas Win-a: Erw'akwessar d usawen Xuşşen-k idrimen Ur k-ḥsiben di tmurt-a Enṭeg taliḍ d asawen Llan, ak-ɣummen And❜akken tefkiḍ acba Ur zmireɣ i ykersiwen Ur ttagaɣ ixşimen A d-irnu Ṛebbi lehna Yerra-yas Wuḥdiq: Ini-iyi-d anda tedda A tiɣimit n ṛeḥba Ziɣen tettakwiḍ-asent Ay izem a bu lhiba And'ik-nwala? Ney mi d-urant ṣfeḍ-itent Ṛṣaṣ m'ur k-iseṛwa Sif m'ur teẓṛiḍ yella Ernu allen-ik qqen-itent

— 51 —

---

Yenna-yas Win-a: Newqeɛ gwakkin d wakka Terna-yi turza Amek akken ara s-nexdem? Ad inigeɣ ɣer Fṛansa A d-ḥluɣ din-a Ma d keččini ur neddem W'ur nerbiḥ da ddunit-a Yerğu ar din-a..., Dagi tezmeṛeḍ-as i lhem Yerra-yas Wuḥdiq: Zhu ur k-illa d ayla Am dihin, am da Ur teẓṛiḍ anda tetten Ṛebbi ayen i daɣ-yura, Fkit-id syenna D kečč i d-ṣawaḍen Ayen refdeɣ ur yejla Deg gedlisen yura A d-iffeɣ akka d asawen...

_{Tekfa teqsit ass n hed 28 di meyres 2004}

— 52 —

---

Ixef 8

Yenna-yas Win-a: Simmal tettaliḍ ay ass Iṭij ittenqas Lḥal ibda ar d-ixetteṛ Igenni tcudd liḥala-s Aɣebbaṛ yerna-yas Ad inɣel a d-iɛemmeṛ Isawal i wedfel a d-yas Ad yeṛẓ isulas Win ur nesɛi ad işbeṛ Yerra-yas Wuḥdiq: Deffir tagrest d tafsut A ttejji tmurt Yal azeğğig a t-waliḍ Iṭij ad iqceɛ tagut A s-yelli tabburt S anebdu ara d-gwriḍ Syen a ttebdu tuẓut Tadellaɛt tafeqqust Ula d lexṛif ad yiṣmiḍ

— 53 —

---

Yenna-yas Win-a: Ta d tutlayt n igelllen Zggan saramen Melmi ar d-tsiɣ teftilt A ḥeṣṛa ay irgazen Wid ittsewiqen Qeṭṭun-d lxiṛ i tfamilt A widak yesgermicen Msakit ttuɣaḍen Werǧin ṛwan taqeṭiṭ Yerra-yas Wuḥdiq: A ccix meqqren deg umaḍal And yedda d aɛeggal Inul ayen i das-ihwan A yat tikli s uqlaqal Nbedd ur nmal Aqlaɣ nessager leqran Win irebḥen ur yuklal F uḥbib' ur ittsal Itettu ayen yezran

— 54 —

---

Yenna-yas Win-a: Amdan idder s wallen-is Ur yelli s wul-is Iskan-as wallaɣ amkan Ad irbeḥ di ddunit-is Ula d arraw-is Ad sɛun ayen akw bɣan Win umi yemunddel yiẓṛi-s Ṛay d aɛdaw-is Ad ictiq ayen yeẓdan Yerra-yas Wuḥdiq: A win yessuddumen aman A bab igenwan Amek akka yewweḍ imceṛṛi Tessmareḍ-as i bu wurfan, Bu wallaɣ yexlan Fell-aɣ tugiḍ a tt-ali Waqila iqleb zman D amcum i gelhan Stafillah a Ṛebbi!

— 55 —

---

Yenna-yas Win-a: Anef-ik i tikli tlawin Nutenti d timeɛlalin Seg zik mačč'armi d assa Ḥebsent kan di texxamin Ur wiḍent d tisefrakin Lhant kan i tarda... Itbiren d tfirlsin S tigwdi i ttcalin Acu ycuban s annect-a? Yerra-yas Wuḥdiq: Amek tuğğal n wassa Yal ta d akerwa Yugar lxiṛ ar ɣur-sent? Tametţut neɣ mergaza Ur yaɛdil ara A tasedda, a tuccent ! Aşaduf n tudert-a Win weɛɛan i kra A t-yeg ma yella ullen-t

— 56 —

---

Yenna-yas Win-a: Ibda waggur ixetti Tafat ur telli S yitran ur nwala Ernu-yas-d ay abruri Ttawil ur nesɛi Kif ilinddi aseggas-a Eddu ay aẓawali S tikli ḥafi Ernu ţbel d lɣiḍa Yerra-yas Wuḥdiq: Tagejdit ibedden tmal Ur fell-as lettkal Ɣas a tt-sɛu isendan A tarbaɛt yecban lmal A lɛebd amexlal Ay addag war iẓuṛan Amek tettcabiḍ timsal Ahat ar userwal Neɣ ar yiman d yigan?

— 57 —

---

Yenna-yas Win-a: Cubaɣ-k ɣer win yettargun Iteddu yettnuddum Ur yezmir ara ad yeṭṭes Yif-ik win-a yettnuzun D netta i d-iqeṭṭun I tettraḍ d anda takres Meqqar ɣas kan ttsusum Ur d-rennu lehmum Balak lḥif ad yenqes Yerra-yas Wuḥdiq: W'isɛan ṣwab yeqqar-it Lefhama txuş-it Ɣur-i d azgen n wemdan Am tikli s teḥṛaymit Tecmet d tawaɣit Izirdiyen ur swan Win yufan izem yeṛẓ-it S laman ixdeɛ-it Iqqar nek d argaz yelhan

— 58 —

---

Yenna-yas Win-a: D tameddurt i k-d-sekneɣ S tikli-w ur ṣeḍḥaɣ Ay akken yebɣu tili Ma twalaḍ ur k-seṛwaɣ Ernu-d ad sleɣ Ma d nek a gma fuken-iyi D ayen ilhan kan i ḥemmleɣ S yis i d-kkreɣ Anef ad mteɣ akk'agi Yerra-yas Wuḥdiq: Ggeddha a tikli gwebrid Tedduɣ kan srid Am assa a ɣ-d-iwali Yibbwas ad ifak lqid Ad yaweḍ s aḥdid Tafat meqqren a d-tali Laşel a t-nerr d agellid Rezgg ad izid Akk'ay ttraɣ a ttili.

_{Amawal: akerwa: patron aṣaduf: reglement}

_{Tekfa teqsit ass letnayen 29 di meyres 2004}

— 59 —

---

Tuɣalin - retour

---

---

_{© Tous droits réservés – Lecture autorisée, partage permis avec mention de la source. Reproduction, téléchargement ou utilisation commerciale interdits.}