Awal n umedyaz - ixf wis 2

Awal n umedyaz - adlis n tmedyezt i d-yesuffeɣ Amar Tafat

Ixef wis 2 - tiktiwin n umedyaz

-- Ixfawen n wedlis -- Ixef amezwaru

---

Nessen

Nefhem neḥdeq nessen Neẓṛa d acu ara d-nini. Mačči d widak ikeṛhen ayen ittiṛiqen Neɣ widak iserwaten Yettun abrid n tgemmi. Awal-nneɣ d win iberzen Yettaga ifadden. Γer tama n wuḥdiq ad yili

— ✿ —

Zreɛ awal

Ẓẓiɣ awal d asefru Nessarem ad yemɣi s tuget Ad isiweḍ am yiger Ur tettili tiẓet Qqareɣ-d ayen iḥwaǧ umdan Ur telli tḥilet Win iḥedqen ad t-yaru Ad t-ilmed s tidet Awal-iw ittekkes εeggu D awal kan ur itett.

— 33 —

---

D acu-yi

Nek d argaz am yirgazen Ur lliɣ qqel ur lliɣ ugar Ur lliɣ seg ucbiḥen Wala lliɣ seg ucmiten Am wid salayen s igenni Ttnadiɣ kan tafat i wallen Taneṣlit ur nelli d urar Tin-a ur nessεi imedyaten Tin-a i nebɣa ad d-ufrar Aten-in yid-i widen i tt-iḥesben Wa yegra wa yezwar Yal tikelt anṣuf yiss-n Yid-sen ad igerrez uẓaṛ

— ✿ —

Tudert di taddart

Kkreɣ-d di taddart-nneɣ Deg udrar n εlayen Gar imdanen yeɣran Medden meṛṛa snen-ten Seg zik ttɣimaɣ di tejmaεt Aṭas i d-lemdeɣ ɣur-sen D aɣerbaz yesεan aswir Awal-nsen d idrimen Seg ul i d-ttawin awal S tarrayt icebḥen Awal zdat wayeḍ iṣeggem "Afeṣel" i s-qqaren

— 34 —

---

Yiwwas kan deg ussan Kkren akk srafgen Ur d-iqqim ula d yiwen Ǧǧan imukan-nsen Igra-d ugraw d lxali S yilem yesusmen Ziɣen sekṛen tiwwura Ifuk uɣerbaz d ayen Ttṛaǧuɣ ayen yekfan Ziɣ fukken imusnawen Tura ibeddel wakud Uɣalen-d imassanen Ad nbeddel kan abeṛdi Ad nuɣal ɣer yidlisen Din ara naf tasekla I d-ttallsen imarrawen Amezruy d tgemmi S tussna iberzen Tajmilt i imusnawen I ɣ-yeǧǧan ṛuḥen Tajmilt i yimyura Ur ittfakka wawal-nsen.

— 35 —

---

Llan yimdanen

Mi yelluẓ ad yuɣal d taḥsiṛt Mi yeṛwa ur issikkid yiwen Yettwali amdan am yizi Yettu, buqerru yeqquren Nnan-t-id imezwura d inzi Inzi-nni i d-yeqqimen "Ur tettru tεebbuṭ yeṛwan Γef tεebbuṭ yelluẓen" Necfa-d i wayen iεeddan Ar tura nettwali-ten Zik-nni ḥemmlen-aɣ Nekni daɣen nḥemmel-iten Mi d-sawlen s yisem-nneɣ Nettazzal nettall-iten Nefka awal nemhel-it Wwin seg-neɣ immuren Nesarem ad nebnu tagmat S llsas d uɣrab igerzen Ad naf irgazen uzekka Imi niɣil d izmawen Kra din yedda deg waḍu Am wakken ur d-nεedda syen Nnan "mhel lxiṛ ttut" Ad k-id-yuɣal ansi nniḍen

— 36 —

---

Akka i nega

Aḥeq win iheddṛen tidet Ar nekni si zik nerwi Nenum wa yettarez wa D aymi negguma ad nali Nxeddem di tferfudin Am ibujaden ur neẓṛi Ur nezmir ara ad nbeddel Daya i yellan d tikti Yak yenn-ak dda Sliman Terwi teberwi Igumma ad d-iḍheṛ yixef-is Nnan : si zik akkagi Ula d nek tegla yiss-i Am nek am kunwi Am kunwi i ttmeyyizeɣ Neɣ amahat tifem-iyi Wiss ma d aṭan ittekksen Neɣ yid-neɣ ara yili Neɣ d ddaεwessu yuran Am ucebbub imezgi Zemmreɣ kan ad wen-d-iniɣ Ad aɣ-icfu Ṛebbi Ad aɣ-tt-ig Ṛebbi am takka Γef yiri ad tt-nezwi Ad d-neḍḥu am uzdigen Iṭij ad aɣ-d-iwali Ad nemyiεqal d atmaten Yiwen mačč' ad t-neseɣli.

— 37 —

---

Asefru di tcihant

Yeḥzen wawal n tmedyezt Mi da t-iɣunza wungif Isenqes-as deg wazal-is Iḥmel-d am yir asif Uḥdiqen yumnen s tmusni Nnan : wagi d aɣilif! Yeɣli wureɣ ɣer tesraft And'akken ur yezdiɣ nnif Di lqella n tigzi yewḥel Armi t-igzem uqeṛṛif Igumm' ad d-yeffeɣ syen Deg texxamt n lḥif Asefru iberzen yemmal Ur igezzem am ssif Ur ismunddul deg wallen Ma d win ur neεṛif Uḥdiq iferrun timsal Isaεdal medden kif kif.

— 38 —

---

Iḍ berriken

Adrar iɣumm-it wagu Iṭij yugi ad t-isefsi Tama n yiḍ berriket Ass-a yif-it yiḍelli Nettṛaǧu ad yali wass Iḥelles-itt-id s ubruri Teḥzen tmusni s immal Imi tuder ur tuli Asm akken lemdeɣ ameslay Γer yimɣaren i d-ittallsen Yal ass yewwi-d tiqsiḍin Amzun ufiɣ-d idlisen Lemmer nettaga leqrar Ad d-neḍḥu seg musnawen Win i d-yusan aɣ-yenheṛ Am ulli n imeksawen Aɣ-yeks alama d-neṛwa Ur neẓṛi i d-immalen Idles-nneɣ iεreq-aɣ Netabaε ikerciwen Ur neẓṛi d acu yeḍṛan Tigemmi neglez-itt dayen Ma yella netbeε-itt akka Wwin-aɣ waman d asawen Tutlayt ččant-tt tiyiḍ Yak εemden imusnawen Amzun akken ur telhi Ttzuxxun s tiden nniḍen Zzux agi d aseṭṭaf Izdeɣ-aɣ akk deg damen Nettaḥqar di nnif-nneɣ Nteddu s win ijenṭaḍen Asefru ma yezleg yecmet Yettban am aman yumsen Am umdan iffɣen deg usentel Iqqar-d ayen mesusen Neɣ ameslay teǧǧa tmeẓẓuɣt Tuɣal ɣer tama nniḍen Γer waya cubaɣ tamsalt Isnegren imeslayen Γer waya cubaɣ tamsalt Isnegren imasanen.

— 39 —

---

Lɛib afuḥḥan

Lεib-agi win yenṭeḍ Ad yuɣal d yir netta Acḥal d irgazen yeɣḍel Yili ur uklalen ara Irgazen yellan d lefḥul Uɣalen ur swin ara D widen iqqaren tidet I keṛhen wid ur nell' ara Zeggiren i lqum ɣer ubrid Ur ẓṛin ass-a d azekka Atan iεedda ad d-inced Nek ɣileɣ ɣer tfaska Nniɣ "a Ṛebbi ibarek" Ad numer cwiṭ ass-a Ziɣen netta inecced Γer ukṛah n tirrugza Imdanen umi yeεreq leṣlaḥ Ttuṛebban ɣef lemḍeṛa Ismed-d aṭas n medden Yerna ur s-faqen ara Wid yecban imextafen Ittawi-ten di ṣṛima Iqqen-asen ṛṣen d usegres Teddun-as akken yebɣa Yak laẓ ur yesεi tinzar Daymi ur telli ssuma Mazal ttnuzen yimdanen Armi ur ttafen ara. A win inecden ɣer yihwah Tewwiḍ isem d amentit Ur tezmireḍ i yiman-ik Ur tesineḍ tazemnit Ma tekkateḍ s yirgazen Nek seqdaceɣ tatiknikit Tikli n yizem tunef-ak Γas kan ur tt-ttinit Eṛwu mejjir acaεtan Rnu qeḍṛan d lḥentit.

— 40 —

---

Lettkal ɣef Wuzmir

Lettkal fell-ak a Ṛebbi Ur nenddim mi k-nεebbed Nusa-d ɣer ddunnit-agi Si temẓi temɣer aɣ-tjebbed Tikwal ad nezwir tikwal ad negri M'ur neqqim aqlaɣ nbedd Ṣebḥan-k a Sidi Ṛebbi S nnig-k ur yelli ḥedd.

— ✿ —

Tutlayt tamezwarut

Slemdet yiss arraw-nwen ad issinen ad tt-arun Tutlayt ur tettali iman-is ma ur nesebɣes wid ittarun Nerra-tt kan ɣer deffir waεrur am wakken nekkes aqelmun Awer feclen iselmaden-is Leqbayel ɣas ttemḍuddun ma d agdud s lekmal-is Izzayriyen ttemɣullun Iwata ad naɣ idlisen-is d taneṣlit i aɣ-d-ḥekkun Anwa ara yeǧǧen tutlayt-is ala abuhal ikemmun.

— 41 —

---

Tamaziɣt ɣer wuḥdiq s wazal-is ur tt-ittbeddil s ugermum Uḥdiqen ɣas ttemḍuddun ɣer nnif-nsen ttembuddun Ayɣer ara nezenter llaṣel Naεdel akk d yiwen wedrum Tutlayt-nneɣ tesawel-d llfeṛḥ yid-s ad idumm Ad tt-nall akk s izzayriyen Kkret seg yiḍes galεum! Tamagit-nneɣ d Tamaziɣt seqsit agad yettarun Rnut salit-tt-id d asawen ma yella teɣli ɣer wemdun Kkret sfezwit s tmussni wid yesnen yiss ad arun Kkret sfezwit s tigzi wid yesnen yiss ad arun.

— 42 —

---

Tussna

Nek ttagaɣ azal i tussna Ittwalin am tafukt Awal-iw bniɣ-t yeqεed Ur iɣumm am tagut Mačči d win iskerkisen Neɣ win ittzewiqen ṣṣut Awal-iw ma iεǧeb-ak ssell-as Neɣ ḥseb-it kan d ṣṣut.

— ✿ —

Tamdint nettɛuzu

Aqlaɣ di Tizi Wezzu Tamdint nettεuzu Idles iǧuǧeg am tefsut Sidi Balwa am qerru Fell-as nettzullu Izga-d nnig am tafukt Tamdint n Tizi Wezzu D asaru d asefru Taqbaylit deg-s ur temmut Tamedyezt deg-s tettuɣu Yuɣal-d wahu Neɣ anaẓuṛ isebbɣen taklut Win terfed ur d-ittrusu Deg-s tettεuzu Am yitri i d-ittnunut Tamdint n Tizi Wezzu Fell-as iwata usefru Ara s-isefḍen tagut.

— 43 —

---

Aseggas amaynut

Anṣuf s useggas amaynut I d-yewwin yid-s aman Yezga-d zdat dujembeṛ Di tegrest gar igefran Imdanen mugren-t s tumert Ḍemεen deg-s laman Deεεun ad yeglu s rezgg Γur-s cudden iḥulfan Ɛussen-t ard yezgen yiḍ Mi yeffeɣ win-a yezran Yal aseggas nessaram Ad neqsen deg-neɣ wurfan Yal aseggas nessaram Ad ččaṛen ula d ikufan Yal wa d amek yesawal Aseggas ameggaz Neɣ bonne année Llan wid i s-ifkan azal Ttεuzzun-t iḍelli ass-agi Wḍen lebɣi d usirem Teddun ula deg igenni Deg ixxamen yugar lxiṛ Nfan ddɣel d tḥeṛci Nekni nesεa Yennayer

— 44 —

---

Kra kan i d-yeṭṭili Mazal-aɣ nɣuza tidet Ansayen n zik-nni Tajaddit mi tt-neserfa Tugi fell-aɣ ad d-ḥami Ayla-nneɣ yesεa azal Wa yerfed-it wa a t-yeseɣli Niɣil nedder kan akka Amzun d agad ur neẓṛi Yennayer yesεa azal Ǧǧan-t-id imezwura Imi yella yesεa iman Yesεa ula d laεnaya Lemmer gar wuḥdiqen Ur t-ttaǧan di lqaεa Yal seggas ad t-ttcebbiḥen Ad terfed yal tasuta Ad t-sfugulen s imecεalen S wayen yesεa d lmakla Imi d lsas n yidles Ad d-yeglu ula s tusna Ttzulluɣ akk fell-awen Nesarem ad teεyu cedda Ad nreffed deg wazal-nneɣ Am uḥdiqen n tmura S umata ttεuzuɣ-ken A kra i d-iwehhan ɣer da Ata yusa-d Yennayer Aseggas yumren s umata

— 45 —

---

Bab n niya

Ḥemmleɣ wid isεan neyya D wid i ttεuzzuɣ aṭas Ma d wid tegzem tḥeṛci D wid nettmaggar yal ass Bab n neyya d amdan yelhan Ur izeggir s txidas Yeffeɣ-d daxel n ttṛebga Isuddes yesεa llsas Γef uxxam-is d anaεmaṛ Yis tumer ula d yemmas.

— ✿ —

Iṭij

Igenni iɣumm s usigna Iṭij yettnadi ad d-iḍill Ittbini-d am acemma Iddeggir-d s ttawil Tamaziɣt walaɣ-tt teεya Nekni neqqar-as aḥlil Lemmer nerza ɣer tira Yili as-d-nefk iɣil Nettεawan ṛumiya Neǧǧa tayemmat tettḥelil.

— 46 —

---

Yuli wass

Yuli wass medden akw ukin Tameddit ad taweḍ yal yiwen Ikcem-d yiṭij ɣer tɣerɣert Ṭya tfeǧeǧ tezra deg yiceqiqen Azwu yekkat-d am lɛembeṛ Am wussan n Tefsut n Imaziɣen Tiziri teḍwa tiɣaltin berriken Uḍan berriken am wussan ttimlulen Tixendaq d tizelgi ṣeggmen Ttazzalen iṭuksa d ikamyunen Win zeddigen iwata ad d-yini Uḥdiqen ad t-ssalin d asawen Win iɣedṛen talsa d wegdud Iwata a s-arzen iḍaṛṛen d ifassen

— ✿ —

Idles

Di tudert yewwi-t wuḥdiq Yefka-t i wid i t-icban D agerruj i asen-yuɣal Ɛussen fell-as si zman Win yeddan yid-s yeslek Yif win-a i as-ibran Timura yiss ufafent Sεant anamek yeswan Imdanen yiss ttwasnen Tigemmi i as-rnan D netta i d iman n tmurt Tudert yiss i d-tettban Yesεa iḍwiqen s amaḍal D ilelli mačči d akeblan Yettawi-d ttawin ɣur-s Tettwenniε tudert yelhan S immal yettnerni wazal-is Ur iqqim anda i t-ǧǧan D idles i yesegemmun tametti D idles i yesnernayen amdan.

— 47 —

---

Newḥel

Ar tura ur neẓṛi amek? Nekkat tegguma ad tṣeggem Newḥel di tmacint tekref Win yebɣan iseɣ ad ileqqem Nezgel taṣebḥit n wass Acu yezmer ad yexdem?! Yura di twenza wulac S tcengut a mmi i d-iɛezzem Di tkerkas yuli weswir Yeṭaxeṛ-as i tikli n yizem Tixidas zedɣent leqseṛ Deg-sent ur yelli usirem.

— ✿ —

Taddart icebḥen

Taddart tecbeḥ s imezdaɣ I usuddes tunez Tezdeg deg-s tettban Ur tserreḥ ur teḥmeẓ Tesεa aṣaduf d wazal Tfetti ccedd ur k-tettarez Uḥdiq deg-s d ṭamen Amcum deg-s ad imeyyez Ḥemmleɣ ad waliɣ taddart Mi ara yili tgerrez Keṛheɣ ad waliɣ taddart Mi ara yili ur tgerrez

— 48 —

---

Taddart benun-tt imdanen At wawal yebrez Tesεa aqerru d ṭemman Yis-n i tettenhez Sεan tabɣest d tmusni Yal wa amzun ikerrez Sfulluḥen iḍ d wass I wakken ad tgerrez Ur εeggun ur ttneεẓiẓen Imi ẓṛan d llεez Mačči menwala ad ixiḍ Ala bab n lqez Win iqeddcen iferru Ṛebbi as-yernu di lεez Win illan d amcum Urǧin yeknez Bab n tmusni yettnerni Yunef-as i usqerbez Ass-a ad yif iḍelli Azekka ad as-ifṛez Fell-asen ad teḍheṛ tafat Taddart ad tfaz Medden ad ten-snemmren Yal tama fell-asen ad teqqaz Kesben nnif d trugza Yis-n tagnit ur texnez Azul ɣef at tejmayεit Mi gerwen teddez tebrez Ṛebbi ad imelleḥ tudrin Ṛay-nsent ad yellez.

— 49 —

---

Bu trugza

Win umi tettunnefk tirrugza Yiwen ur izmir as-yekkes Awal-is refden-t medden Deg wazal mačč' ad yenqes Ittawi-d tiktiwin deg ubrid-is Izga ittṣeggim, iferres Rzu ɣer imuhal-is ad teɣreḍ Tigzi ɣur-s teḥbes Din ur yezdiɣ ukerfa Annar-is s tussna imelles Tesway-as-id s lqewa Mačči am wid umi teεkkes Win yusmen ɣas ittjebbiṛ Ur isaweḍ ad t-yekres D tikci n Ṛebbi lεalamin A win ifehmen kyes Acḥal n widak yesnen Ur ṣawḍen aserhu-ines Ula d widak iẓewṛen Tettren di tallelt-ines

— 50 —

---

Imeddukkal

Llan imdukkal yelhan Imegziyen ttɣiman Llan wiyiḍ ur ttdumun Ayagi d-lḥiɣ di zman Mugreɣ-d igiman Ur ttεeṭṭilen ttṛuḥun Llan kra cban imawlan Ḥedqen d imḥaddan Ma tuḍneḍ ak-seḥlun Γɣran ssnen izerfan Ssnen azal n wemdan Γef ulac ur k-ttɣunzun Iḥbiben n tidet ur qwan D imexḍa ay llan Ay yegten d wid yettḍuddun As-temleḍ abrid yelhan Nett' ak-iɣder s laman Ak-d-yuɣal d azrem uqelmun.

— ✿ —

Yif win yessnen

Win issnen i yiman-is Yelha ula i yeqriben-is Ur ṭuquten wuguren Atan yedha d imuhal-is Iferru iɣeblan-is Γas d win kerhen medden Eǧǧ-it netta d ṛay-is Ṛebbi d amεiwen-is

— 51 —

---

Ur t-yif ula d yiwen Argaz isedduy axxam-is Izmer i yiman-is Ur iḥwaǧ ara imḍebbeṛ Ittsellik aqerruy-is Ittḍebbiṛ ixef-is Ad irbeḥ ur ixetteṛ Yessen ad yeddu s lqis Iteddu d temtilt-is Ur yeǧǧ' ungif ad t-inheṛ Ma telliḍ d argaz εiwen-it Mi terza twaɣit Deffir waεrur-is ur heddeṛ Kečč d bab n tfenṭazit Terniḍ tanifit Ula d uḥdiq ak-isnemmer Yeḍfeṛ argaz bu wedrim Ara s-ittcekkim I wakken ad d-imceḥ ɣur-s Izuɣur-it am ubhim Yuɣ-it s walim Lεali imneε-it deg-s Ar deqqal yefka-as agelzim Yerna-yas aclim Zreε-iyi-d tasga n yiɣes Adrim yelha d ttawil Ur nettεebbi ur nettmil Akken ad nesifses taεkemt

— 52 —

---

Ur nettnuz ara f ugertil Di trugza nettkemmil Akken yenna bu tegdemt/teɣdemt Seg sya armi d aqbil Atan iteddu s ttawil Ad d-yawi wungif tazdemt Tudert ɣef tmira Mačči ɣef tmura Ǧǧan-t-id wuḥdiqen Wid yeɣran wḍen timura S tussna d lefhama Wwin-d idrimen Fsin i twacult turza Kksen tabarda Akka ixedmen yirgazen

— ✿ —

Tismin

Ad d-awiɣ awal ɣef tismin Γur-i win ur tent-nesεi yerwi Maca tismin imeεnen Mačči d tidak n imerwi Ttwaliɣ wid ittasmen xuṣṣen Amzun d iεdawen n tmusni Deg ifassen ttawin imegran Qeḍεen i tussna ad d-temɣi Ttεassan-tt ur sεin naddam Tuɣal-asen d tanumi Mačč' asen-d-yefk Wuzmir tunṭict D asyax ad ten-yawi

— 53 —

---

Nekni ur asen-nezmir ara Uɣalen-aɣ d tifidi Win isεan tismin yelhan Yekkat amek ara d-yali Iqeddec s lebɣi n wul-is Maεlum netta d imegzi Ittarra leǧwab i wexṣim Labudd ad d-yenqec tirni Win ixeddmen yettaf agerruj Mačč' am win yezgan d iɣimi Ur ittqeliq di medden Am uḥdiq i yettṛaεi Yal ass yewwi-d amaynut Ayla-s isuli-t s igenni Γef waya i wen-d-nniɣ Lhant tismin lεali Ma yeḥdeq ɣas yettasem Ar ɣur-i ittmecbiṛqi Iban ur ittsabuṭi

— ✿ —

Win yettawḍen

Ittaweḍ ayen i t-ibaεden Itteklufuy s lqewwa Ssnen-t akk imdanen D win ur nessin ara Ur ttεanad ara ungif Meskin ur t-ttqas ara Imi aneli-ines yulwa Srid ur t-kkat ara

— 54 —

---

Ittmagar-d igan-is Deg isefra neɣ di tmenna Kečč d amedyaz afṣiḥ Ur nelli d menwala Ur yerbiḥ win ur nessin Zheṛ d ayen i das-ifka Yekkat ad d-innal sqef Yettṣubbu ɣer ddaw lqaεa Yebɣa ad yuɣal d sidi M'akken yeseεfen tala Tismin zḍan-t allaɣ-is Aḥezzeb deg-s yenfa Ittwali izem meqlubi Am cwiṭ n lbaṭaṭa Iqqar-d ayen ur nemεin Am wakken d llbenna Am tamemt n waṛẓaẓen Ur telli deg-s ddwa Neɣ am tikli s uneggez Akken txeddem tgerfa Am saεd win ittagan lxiṛ D win ara yaf di tagara Γulleɣ-k deg win isamasen Yezga ittenneḍ di tẓegwa Ifassen-is ur zeddigen Isfaḍ-iten s iselsa Ulac amdan iwaεṛen Am win teǧǧa lefhama

— 55 —

---

Timeqlac

Ma ur llint tirrac Yif-it ad susmeɣ Ur sakwayent tmeqlac Fell-asent ad qqimeɣ Yif win yekkaten aqabac Di lɣella ad ḍemεeɣ Yak meqqrit mačči d arrac Ur ilaq ad skerkseɣ Ma ur llint tirrac Akerfa ur d-qqareɣ Ma gtent tmeclac Ad ṛǧuɣ awal n wureɣ D win ittekksen leɣwac Aqeleq ur izeddeɣ Nniɣ-ten-id yiwen yiwen Ma tḥesbem zran meyya Bniɣ-ten tennam gerzen Tanemmirt-nwen s umata Fell-awen taɣuri igerzen A kra ukud i d-nemmezga Awal-iw d ayen iy-iceɣben Iceɣben medden meṛṛa Mi ara nyaweḍ ɣur-wen Ur t-ttarra-t di tama Γas akken yezreε d iḥricen Ad d-afem ula d isefra Iɣezzfanen d iwezlanen Kra din ad tafem yefra Eslet ɣɣret sifet-tten Nessarem ad d-lemdem kra.

— 56 —

---

Times

Tekker tmes deg idurar-nneɣ Di tzemmrin tufa iman-is Tekkat tettali s igenni Tettengiz s ifeṭiwjen-is Tettenkar yal ass di tudrin Tesuffeɣ-d di tuccar-is Izarazen At Yiraten At Dwala Bgayet nwala isallen-is Teǧǧa-d deg ul camma Yal ṣmayem s txeṣṣaṛt-is D tagi i d lhemhama Aḥlil win ur nessin azal-is Tettaweḍ ɣer yemnaṛen Tesruɣuy s tfendas-is Abbu-ines izlef agrud Yenzef di tfesniwin-is S ceḍb qublen-tt lefḥul D waman mḥan llateṛ-is Tacemlit ay atmaten D tin kan i d leslaḥ-is Ur stehzayet ay isexsayen Zzit-as am uqusis Yal wa ad yeg asullef Ad isizdeg tawwurt-is Ad nferset zdat yexxamen Ad nesifeg lεec-is Ur tettaf gacu ara teṭṭef D tagi kan i d tifrat-is Ma d win iskaren times Ad yemlil netta d lfeεl-is

— 57 —

---

Asemmiḍ

Yiwwas lewhi n tmeddit Ffɣeɣ-d anda d-mlalen Medden bedden s ibernyas Γummen ula d imi-nsen Seg usemmiḍ aqarḥan Rran-d iqelmunen Irgazen am yitbiren Igerdan i lmend-nsen Att-a tusa-d tegrest Nessarem ad d-tawi igefran Ad d-teglu s ideflawen Deg ul ad kksen wurfan Ifellaḥen ad ummren Mi ara walin lhan yigran Ata yusa-d Yennayer Imaziɣen ummren yiss Yal tama la tettzeqziq Rnan-as ass n uderyis Tameɣra s isaragen Awal izad ur yenqis Cebḥen-tt-id imasanen Yal wa s usarag-is Sefran wwin-d tajrirt-is Aṭas i d-nelmed ɣur-sen Awal-nsen ur yenqis Yal wa ad yaf tumert Ṛebbi ad yezyen isem-is

— 58 —

---

Taḍṣa

Telha ciṭṭuḥ n ṭeḍṣa Tessifsus ɣef wulawen Ula d iɣeblan ak-ttun Ma teḍṣiḍ tenecṛaḥeḍ Ma teḍṣiḍ icṛeq-d yiṭij Imeddukkal yid-k ad feṛḥen Menyif ma tezhiḍ teḍṣiḍ Wala ma tezgiḍ tekkusmeḍ Ma ur tennecṛaḥeḍ ur teḍṣiḍ A d-bineḍ amzun tkemceḍ Ddunnit tetteddu s nuba Ass teḍṣiḍ ass tfeqɛeḍ Meskud ur k-yuɣ kra Nadi amek ara turareḍ

— ✿ —

Isefra

Isefra zerɛen di tmurt Ǧuǧgen am tefsut Ttakken-d ṛiḥa ẓiden D asefru i ya-d-isnesren D asefru i yaɣ-irefden D asefru i yaɣ-isrebḥen D awal i d asefru D amrig ur nettru Yezga yettawi-d ayla-s Ma tessusmeḍ d aɣuru A d-ifuṛṛ seksu Ad ak-ṛemden gar tsullas Ayyuz fell-am a taqbaylit Arraw n tfamilt Wid iḍefṛen tajaddit Ungif ma yega takriṭ Talɣa n tyaziṭ D acu yerbeḥ di cciɛa-s!

— 59 —

---

Iɣersiwen

Iɣersiwen s umata ur ẓṛin Ansi d-usan Wala anda teddun Kessen tetten deg uddaynin Ur ẓṛin win i ten-ittbuddun Ḥemmlen lqeṛḍ walim Akked tissit deg umdun Am wid izerɛen aclim Zenzen adrum s weɣrum Di tɣerma ur ttikkin D iman-nsen i ttɣurun Idles-nsen d tacciwin Zgan ttemguclun Wagar-sen ttemcikkin Mi rfan ad ttemṣukkun Iǧǧa-ten wakud ur ukin Ayla-nsen a t-ttɣunzun Keṛhen ula d iman-nsen Am izerman i ttṣuḍun!

— 60 —

---

Amaḍal yuɣwas

Ddunnit tuɣal ansi d-tekka Yal amcum yessawal ɣer tirwas Nugad ad ttenger Ddunnit Amaḍal yehbel yuɣwas Ttnulfunt-d tegrawliwin Tixxeṣṣarin ɛddant tilas Ayen ǧǧant tergagiyin Ayen din yeɣlin d aterras Ɣaḍen-iyi iɣeṛfan inegren Ɣellin s lembumbat d ṛṣaṣ! Gar medden teɛṛeq talwit Win tt-icudden ifetti-yas Rennun-as asbuḥru i tmes Yal wa d ttaṛ yettalas Yuɣal armi texleḍ tegnit D wa i d zman amessas! Anwa ara iqeblen tizeɣzeɣt Agrud deg rebbi ḥtalen-as Ttwaṭṭfen irgazen d tlawin Ttwaqnen di leḥbas Amcum isenger axxam-is Tamdanit temmečč deg wass Ttwaliɣ-tt ur din tifrat Yal wa yettgalla di gmas Zerɛen ssem deg mezruy Yal wa ijebbed ar tama-s Azref yeba ur yeḥdiṛ Yesɛa anda yega lḥaṛa-s Yerfa ɣef widen itettun Ur nettnadi ɣef tlaba-s Amcum s immal yettzidi Yettalbab deg iḍ deg wass Wid ineddṛen ur d-ttḥellin D tameṭṭut neɣ d aterras Iɛeṛḍiyen ittnadin tifrat Weḥlen di txidas Azeɣzeɣ yuɣal d azref Anw' ara ibeddlen sira-s!?

— 61 —

---

Tuɣalin - retour

---

_{© Tous droits réservés – Lecture autorisée, partage permis avec mention de la source. Reproduction, téléchargement ou utilisation commerciale interdits.}