Tafaska n tmeṭṭut, 8 di meɣres

Tewweḍ-d tfaska tamaḍlant n tmeṭṭut, ass yecban ass-a 8 di meɣres. Ass-a yal tameṭṭut ad tumer ass-is, ad teffeɣ ad d-taɣ tiɣawsiwin s wayes ara tumer, neɣ tin yesɛan argaz ad tt-ibarek s kra n terzeft, am wakken yella wanda i d-yettili wesfuggel n tfaska di kra n tudrin d temdinin, dɣa din ad tekki ad tesfuggel ass-is n tumert.

Tameṭṭut d nettat i d tayemmat, i d-yefkan tudert d tmussni i wemdan. Ur ẓṛiɣ ara amek i d-yella wemgarad tuder ɣef wergaz. D netta i t-id-yesɛan, d nettat i d-iṛebban irgazen, i d-iṛebban imassanen d yimussnawen. Imken ahat imi teḍɛef, ur tesɛi ara ǧehdd am win n wergaz, dɣa tettwaḥqer, akken qqaren : aslem ameqqran ad yečč amecṭṭuḥ. Wama anda ulac tameṭṭut ad terku tegnit, ad d-yeɣli unezgum ɣef wemdan, ad yili uxiqi d ameqqran. Anda tella tmeṭṭut ad d-tili tezdeg, ad teǧuǧeg tegnit, ad teǧuǧeg tmussni, ad tidir tutlayt, imi tameṭṭut d taḥarazt n wayen yesɛan azal, iwata ad as-nerr lxiṛ s tejmilt d tɣawsa yesɛan azal. Qqaren imezwura deg yinzi n teqbaylit:"tameṭṭut d llsas, argaz d ajgu alemmas", acku di tmurt n yimaziɣen tameṭṭut ssnen azal-is am wakka i d-wwiɣ fell-as di tazwara, i yettmeyyiz fell-as yal amaziɣ uḥdiq. 

Ad d-nesmekti tayemmat i ɣ-d-iṛebban isbedden axxam, ad d-nesmekti tulawin lɛali i d-yeǧǧan isem-nsent deg umezruy, am : Dihya tamaziɣt, Lala Faḍma n summer, d tlawin timussnawin yecban Faḍma n at Menṣuṛ d Ṭawes Ɛemṛuc, Iɣil aḥriz, d waṭas n tulawin ittekkin di tegrawla n 54, am Ḥassiba Benbuɛli, d tiyaḍ... Fell-asent tajmilt d talwit ɣef iziɣer-nsent. Deg unebdu nni iɛeddan yusa-yi-d usefru ɣef tmeṭṭut mechuṛen deg umezruy, imi ayen texdem isewhem-iyi imi tesɛa tirrugza aṭas, irgazen ur ṣawḍen aswir-is, tagi d Faḍma n Summer:

D ayen isewhamen nezzeh Mi ɣ-d-ttawin ɣef imezwura Xedmen igan imeεnen Γas akken ur ɣrin ara Am tlawin am yirgazen Rran idurar d luḍa Ṛẓan uguren imeqqranen Ttawil ur yelli kra Amedya n Faḍma n Summer Tameṭṭut yecban tasedda Cḍeɣ ma zeggreɣ fell-as Tajmilt m'ur s-tt-rriɣ ara Seg wasmi tella meẓiyet Tesmeɣnis ɣef tegrawla Teǧǧa tudert n tlawin Akken ad d-sbin tamurt-a Tettmeslay ɣef tlelli I yimdanen s umata Sellen-as argaz tameṭṭut Ufan d ayen i d tirrugza S uεudiw tenddeh tezwar Llan deffir-s meṛṛa Tamekḥelt gar ifassen-is Teffeɣ mgal icenga Tennuɣ d ucengu tewwet-it Akked uɣamar n Fṛansa Ṭiyita n Icerriḍen Teqqim-d amzun d cama Γas akken texṣeṛ di ṭṛad Gar uɣamar tega targa Faḍma n Summer d tasedda Amkan-ines di ṛeḥma Tameṭṭut yesεan tirrugza Isem-is yeqqim-d i lebda Yis i newweḍ timunent Tebda-tt-id tkemmel telha Amezruy yura-tt s tehri Am nettat am zuεama.

Sɣur: Amar Tafat, yettwakkes-d deg udlis Awal n umedyaz

---

_{Anṣuf s tirza-nwen ɣer ublu-inu! Ur εeggzet ara ǧǧet-d awennit . Merci de visiter mon blog ! N’hésitez pas à laisser un commentaire.}